Ticker

10/recent/ticker-posts

Zirlaite leh ram leh hnam tan theihtawp chhuah kan tum - MZP President; Laisawral a Takamin Mizo kut an thlak chungchangah MZP-in hma lak ngei tum!

Aizawl | January 10, 2021: Mizo Zirlai Pawl (MZP) General Headquarters, Aizawl chuan vawiin chhun dar 12 khan kum thar atan pisa an hawng a, hawnna inkhawm hi MZP vice president Andrew F Lalramnghaka'n a kaihruai.


MZP President Lalnunmawia Pautu chuan thu sawiin, "2022 hian Zirlaite leh ram leh hnam tan theihtawp chhuah kan tum," a ti a, "December 23, 2021 khan Laisawral-ah Chakma-in Mizo kut an thlak a, hei hi MZP chuan na a ti a, he thilah hian MZP general headquarters chuan hma a la ngei dawn," a ti bawk.


MZP Pisa Pui hawnna programme hi MZP Conference Hall-ah hmangin,  MZP adviser Dr Vanlalremruata Tonson in hunserh a hmang a, MZP General Secretary Jacob Lalmuanpuia'n report a pe bawk.


Vawiin vek khan MZP chuan, Mizo Church of Iowa, USA atanga Myanmar raltlante ṭanpuina tur Rs. 1,49,200.00 a dawn chu sem chhuak nghalin, Synod Camping Center, Neihbawih leh Sport Hostel, Mualpui a raltlan khawsate hnenah; Buhfai, Alu, Dal leh Artui thahnem tak a hlan a. Mizoram hmun hrang hrangah tanpuina sem chhunzawm zel tum a ni. 


MZP President thusawi ṭhenkhat:
• Kumin hian Mahni ṭheuh-ah hmachhawp leh hlen tum nei turin member te a chah.
• Zirlai harsate ṭanpuina atan trust fund kalpui tum a ni a, hemi atan hian MZP Pisa Pui-ah bawm dawh a ni ang.
• Zirlai ṭanpui ngaite chu College SU te'n MZP hruaitute hnenah thlen hreh lo turin a chah.
• Zirlaite chu COVID-19 Vaccine la vek tur leh hripui laka kan him theihna atan sawrkar thuchhuah te ṭha taka zawm a, an zirlai ṭha taka zir turin a chah.
• Sawrkar chu SOP a siam-ah ei chawp zawng leh mi harsa zawkte dinhmun ngaihtuah chunga dan siam turin a ngen.
• Mizoram chhung Aitlang leh Saihapui V chhehvela kuthnathawktute'n an thawhrimna rahchhuah an seng ngei theih nan sawrkarin hma la rawh se.
• Mizo Church of Iowa in MZP hnena pawisa an pek hmangin Burma raltlante ṭanpuina vawiin tlai aṭangin a pe dawn.
• December 23, 2021 khan Laisawral-ah Chakma-in Mizo kut an thlak a, MZP chuan na a ti a, he thilah hian MZP general headquarters chuan hma a la ngei dawn - a ti bawk.




Post i hmuh dan

Post a Comment

0 Comments