TU TE HI NGE THLARAU MI?

- K. Remruatfela

He thupui ziak tur hian mi tam tak chuan tling lo leh tlâk lo, thlarau lampanga la naupang lutuk leh thlarau awmzia leh nihphung pawh la man phalo nia min hmutu leh ngaitu tam tak an awm âwm e. Chuvang chuan mahni insit pawh a na duh hle. Amaherawhchu, eng nge Pathian thuhmun be theuh theuh leh Bible version thuhmun ring theuh theuh, tawngtaina nena A hnena kan dil chuan min chhan loh bik ang tia, mahni inthiam chawp chungin, thlarau mi awmzia leh thlarau mi nihna ka theih ang tawka lehkhabu atang tea ka lo chhiar a, Pastor thenkhat ka lo zawh ve nate leh ka tawngtaina atanga ka hriatthiam dante hmachhuanin rawn puanchhuah ve ka tum dawn a ni. 

Thlarau mi tih hi Zofate tawngkama mikhual lo tak a ni a. Hrilhfiah dan a tamin, pawm dan pawh a tam hle. Rev. Dr. R.Lalthanmawia chuan Pathian thua “hram hram”; “talh talh” tih telna apiang hi a thlarau lai tak zel chu a ni a. Chutiang “hram hram” ; “talh talh” huaisen taka paltlang thinte hi “thlarau mi” te chu an ni a ti a. Tin, Rev. Dr. L.H. Rawsea ve thung chuan, “Pathian malsawmna kan dawn avang ringawt ni lova, tuarna leh harsatna kan tawrh chang pawha Pathiana vui mai lova, lawmthu la sawi thei zawkte hi thlarau mi dik tak chu an ni” a lo ti ve bawk a. Khawvela theologian ropui berte zinga mi Rev. Charles Stanley chuan “Harsatna kan tawh châng pawha Pathiana vui mai lova, he harsatna ka tawrh chhan hi Pathianin keimaha fiah duh a nei a ni tih leh, ka thatna tur zawka min sawizawina a ni tia rilru dam taka pawm theitu te hi thlarau mi te chu an ni” tiin a lo hrilhfiah ve bawk a ni.

Heng, kan Puithiamte hrilhfiahna hian “Thlarau mite chu tute nge” tih zawhna chu thui tak a chhang awm e. Mi tam tak chuan A (Pathian) malsawmna kan dawn avanga aw/taksa hmanga Amaha faka chawimawi thintute chauh hi maw “thlarau mi” kan ti thin a. Amaherawhchu, ngun taka ngaihtuah chuan thil dik ber niin a lang lo. A chhan chu he khawvel hi ringtute kan hahchawlhna hmun nilovin, kan vahvaihna khawvel, mahni hrehawm pawisa lova, nitin a kraws pua a hnung kan zuina hmun tur a ni a. Amah fak leh chawmawi chu ringtute tih tur leh thlarau khawvela kan hnapui ber tur leh kan tih tur awmchhun chu a ni takmeuh mai. Amaherawhchu, tisa khawvela chêng kan la nih miau avangin thihhnu piah lam ram khawsak ziaa khawsak tum ringawt lovin, chu hmun nuam, bâng lova Lalpa kan la fakna hmun tura chêngve thei tur chuan keimahni mai ni lovin, kan unau, Krista la hre ve lote hnena hriattir hi thlarau mite hnapui ber tur chu ni âwm zawkin a lang. 

Ringtu nun hi kawng harsa tak, hling tam tak paltlang ngaihna hmun a ni a. Amaherawhchu, chung tuarna hun a lo thlen pawha K. Lathanzama anga “Ka neih eng pawh chan dawn mah ila, lawm chungin a rawng ka bawl fan ang” ti theitu hi thlarau mi dik tak awm dan tur niin a hriat. Joseph Scriven a mi kha, an inneih dawn zana a nupui hual tuiah a tlakhlum hnu pawh a, ‘Lal Isua kan thian tha berin kan mangan lain min lawm’  tia a nu la hnem thei cheu tu kha? Chumai a la ni hlei nem kan kristian hla lar tak KHB No. 428 na phuahtu Mrs E.P.Prentiss chuan hun rei lote inkara a fa duat lai ngawih ngawih pahnih a chan hnu chung pawhin ‘Hmangaih zual che ka duh Lalpa Isu, ka duhsam ber ni se, hmangaih zual che’ a la tifan a sin! Kan Kristian hla dang “Khawvel hrut chhuak ila Lal Isua ang hi’ tih hla phuahtu Spafford a`n he hla a phuah chhan pawh hi a ropui  asin! Kum 1874 kal taah khan French mei lawng America atanga haw lamah a nupui leh a fate pali chuanna lawng chu a chesual ta hlauh a, a fate zawng zawng chanin a nupui chauh a dam chhuak a. Mahse ‘Khawvel hrut chhuak ila Lal Isua ang hi, thianghlim leh fel ka hmu lo. A nunna min pek avangin ka zui ang, hrehawm tuarin rethei mah ilang’ tiin Pathian laka vui reng reng lovin, tihian lawmthu a la sawi zawk thei a sin! Keichuan, heng mite hi thlarau mi diktak chu an niin ka hria.

Hla phuahtu J.W. Peterson chuan, “Kawng awlsam a ni lo, vanram kan panna kawng hi; hling tam tak awmna kawng a ni e” a lo ti a. Tin, kan hla sak lar tak KHB. No. 383-na mi phuahtu Lalhriata pawhin, “Harsatna tinreng hnuaia leng kan ni, krista rawngbawltu zawng zawng te” a lo ti ve mek bawk a. Amaherawhchu, heng tuarna leh harsatna zawng zawng kara Pi Lalruali anga, “Hrehawm mah se i ta ka ni Lalpa, i tan nung turin min pui la, ka hun zawng i tana hman ka duh, i tan chauh min tithianghlim ang che” la ti cheu theitu te hi keichuan thlarau mi dik tak ka tih ve te chu an ni. Eng ang mite hi nge thlarau mi kan tih ve le?