Aizawl the 4th January, 2022 : Labour, Employment, Skill Development and Entrepreneurship Department hmalaknain Mizoram Team member 12-te chu trade 9-a India Skills National Competition, New Delhi-a neih tura intihsiakna hmachhawn turin Pu Lalramsanga Sailo, Secretary, LESDE Dept. chuan vawiin khan a vailiam.
LESDE Secretary Pu Lalramsanga Sailo chuan intihsiaknaa tel turte lawmna leh duhsakna thuchah sawiin, Mizoten talent tha tak tak an neihte National level-a phochhuahna tur remchang bawhpelh lo a, an thiam leh theihna neihte tihpun a, he hun hi malsawmnaa chantir turin a fuih a ni.
Indiaskills 2021, National Competition-ah hian Regional level Competition - zone hrang hrang pali (North, South, East leh West Zone) atanga Gold leh Silver medal dawngtute an intihsiak dawn a. Thalai 2.5 lakhs chuang tel tura in-register zingah, Regional Level competition-ah hian mi 500 chuang an tling a, heng tlingte hi National level-ah hian an inel leh dawn a, trade hrang hrang 54 hmangin an intihsiak dawn a ni. Mizo thalai tel turte hi Bakery, Carpentry, Fashion Technology, Floristry, Hairdressing, Hotel Reception, Painting & Decoration, Plumbing & Heating leh Welding trade hmanga intihsiaknaah an tel dawn a. He intihsiakna paltlangte hian World skills 2022, Shanghai, China-a neih turah India aiawhin intihsiakna an hmachhawn leh ang.
He Flag off programme kaihruaitu Pu K.Lalhmingliana, Director, LESDE Dept. chuan Mizoram aiawh a chhuakturte inhmel hriattirna hun hmangin, khawvel huapa Skill lama inelna sang berah Mizoten sulhnu an nei ve tur hi lawmawm a tih thu sawiin, hei hi thalai tam zawkte skill lam hmelhriat tirtu a lo nih a, Mizo thlalaite hian hmabak eng tak vocational education-ah hian an nei a ni tih lantirtu a ni a ti bawk.
Mizoram Team-te hi LESDE Director leh Officials pali ten an tawiawm a. Intihsiakna hi January 6 – 20, 2022 chhunga neihtur niin, Pragati Maidan, New Delhi ah nghah a ni dawn a ni.
Post a Comment
He post chungchanga i ngaihdan lo sawi ve rawh: