Ticker

10/recent/ticker-posts

Saitualah India Republic Day 2022 hmang

Aizawl January ni 26, 2022: Hrileng karah ramchhung hmun dang te ang bawkin Saitual ah pawh India Republic Day urhsun taka lawm a ni. Saitual District ah hian zing ni chhuah rualin sawrkar pisa ah hnam puanzar zar niin sakhaw biakin ah ram leh ram hruaitute tan tawngtaina neih a ni.


Saitual District a Republic Day lawmna pui ber hi Govt. Saitual College tualzawl ah hman a ni a, Saitual Bawrhsap Pu VL Hruaizela Khiangte khuallian chuan zing dar 10 ah hnam puanzar apawt pharh a, 2nd IR Battalion ten Hnam puanzar zahna chibai an buk chu Khuallian hian a chhang lĂȘt a, MRHG Band Party, CTI Sesawng ten Hnam hla an rem bawk a ni.


Bawrhsap chuan thusawiin India ramin zalenna a neih ruala thleng tel nghal chu mipuiin zalenna kan nei hi a ni a. Danpui (Constitution)-in a ken tel nghal erawh ram leh sawrkar dan zawmtu tha kan ni tur tih hi a ni. Khua leh tui tha chuan ram dan a zawmin roreltu thu an zawm tur a ni a. Hei hi kan Kristian zirtirna nen pawh a inrem em em a ni. Covid-19 kan dona kawng bakah District inrelbawlna-ah mipuiten roreltute thu leh dan siam te kan zawm tlan chuan khua leh tui tha tak kan ni tihna a ni. Chuvangin ram leh hnam, sawrkar tan kan inpe tur a ni a; ram leh sawrkar tana kan tih theih ang tawk kan tih ve hi a pawimawh hle a ni.


Ram Danpui (Constitution) kan nei hrang hi ‘mahni-a inrelbawl a, kan ai awha roreltu tur thlang thei a, tu thu hnuaiah mah kun bik lo tur kan nihna’ entirtu a ni a. Danpui avanga Republic Day kan hmang ang hian, tute pawh hian sawrkar dan zawm a, ram leh khawtlanga kan theih tawk ti theuh turin kan insawm thar leh a ni.

Saitual District a sawrkar hmalakna tih hlawhlhtlin tawh leh hmachhawp hrang hrang tarlangin:

E-District hnuaiah aadhaar card leh certificate dangte pek chhuah theih te, NH- 6 leh NH-102B siama kalpui mek leh ram enfiah leh compensation te kalpui mek te, DC Office Complex sak hna kalpui mek te, Teikhang khuaah Border Police check post sakna tur hmunhma police kuta hlan te, SEDP leh PMGSY-I hnuaiah khaw kar kawng engngemaw zat blacktop leh panel concrete a siam te, DUDO hnuaiah vantlang inthiarna sak a ni leh IHHL mi 191 hnenah pek te, MNREGS hnuaiah hna hrang hrang thawh leh mipuite ni 86.16 inhlawhna siam a ni te, SEDP hnuaiah vaimin thar tha ber an ni te, Nuai 29.67 hmanga cocoon building sak mek te, Phullen leh Thanglailung chawmtu tur tui lak hnathawh zawh te, NE Tlangnuam, Khawlian, Suangpuilawn, Lamherh tuilakna tur ruahman mek te, Maite khua power lak na 11kv line siam zawh a ni te, Tamdil a Sports fishing neihna tur atan nuai 1.8 sen leh a chei nan nuai 19.38 sen a ni te, RUSA hnuaiah Library nuai 90 hmanga sak mek te, Sangha chi nuai 2, 70%subsidy in sangha khawitute hnenah sem a ni a, DVO hmalakna in Bawng 46 kah rai leh ui a hri danna ui 482 pek a ni te, FOCUS hnuaiah tui dah khawlna khaw panga ah siam a ni.

Horticulture hnuaiah Saitual District chu hma kan sawn hle a. Dawnfawh bikah huan Mizoram chhungah hybrid (Madhuri var) hlawhtling taka chin theih a ni tih enchhin (trial) hmasa bertu kan ni. He programme hnuaiah hian hna hrang hrang thawh niin, thlai leh thei phun te, thlai huan – thingfanghma, dragon fruit, Assam lemon, balhla leh sethlum te chin a ni a. He plantation hian kum 2021 chhung hian chhungkua 369 lai huamin Spices (zo-chilli), tomato (off-season), zikhlum (off-season) te chhungkaw 281 tan ruahman sak an ni.
Khuallian hian thu asawi zawh ah Saitual Town Sanitation buatsaih fai intihsiakna Swachh Ranking pakhatna theuh te lawmman semna a nei chhunzawm a, VC Area ah Sihfa VC, Govt. Office ah SP Office, School ah PES Keifang leh Hotel/Restaurant ah Green Hills Hotel Keifang te hnenah thuziak leh pawisa fai a hlan a ni.

Hun hmanna ah hian sawrkarin inkaihruaina a siam zawm chungin mi sawm bik ten tlemte in Republic Day lawmna hun an hmang a ni.

Republic Day lawmna hman zawh hian Hlimna In (Girls Home) leh District Hospital Saitual Poor Fund ah Republic Day pualin thilpek hlan a ni.


- DIPR
Post i hmuh dan

Post a Comment

0 Comments