'PRESSURE GROUP' KAN NI LO A MAW?

- Jeremy M Pudaite

Champhai YMA Sub Hqrs hruaitu khan an inhnuhdawh chhanah, pressure group ni loin voluntary group an nih thu te, khua leh tui tha tih tur ni-a a ngaih loh thu kha YMA thuthlung 8-na chham chhuak meuhin a sawi a nih kha. Heti hian, ' Ram roreltute thawhpui thiam mi, sawisel mai lova thurawn petu nih ka tum tur a ni a, sorkar tan khua leh tui tha ka ni tur a ni' tiin.

pic by:Vanglaini

YMA thuthlung 10-naah, "YMA member ka nih avangin Mizo hnam mawina leh YMA thianghlimna puangchhuaktu ni turin ka nunphungah ka fimkhur reng tur a ni" tih thu a lo chuang ve bawk. YMA Kaihhruaina number 3-naah pawh ' Thudik ngaina leh tan tlat mi' tih te, 7-naah 'Khawtlang thatna ngaihtuah mi' tih te chenin a lo chuang ve kalh tho bawk a nia. Ngaihtuah a tithui ngawt mai. A pawl member chu sawi loh, hruaitute ngei pawh hian kan changvawn leh thuthlungte hi a sang ema kan phak lo em ni le? Ram leh hnam humhalh kumpuan thupuia hmanga nasa taka Tuikuk leh Chakma huangtaute dodal a, candidate an nih loh dan ngaihtuah thintu, CADC direct funding dodala Nepali OBC status chungchanga hmalatu, ILP kengkawha hma la thin, zu leh damdawi doa SRS/CADS dina hma latu, Shashank Out movement-a Hnam hnatlang min neihpuitute hian engvangin Smuggling issue-ah 'Khua leh tui tha nih chungchang leh 'Pressure group ni lova voluntary group' an nih thu an sawi tak daih mai ni?

Voluntary group hi pressure group a ni thei a, hreh tur pawh a ni lo. Pressure group avangin sorkar kalphung a fel phah fo a, roreltute leh an rorelsakte inkara rawngbawltu niin, sorkar dik leh langtlang siamtu an ni. Nimahse, 'non-profit, non-political organisation-a hruaitute an 'political' ta viau emaw tute emaw nena 'profit' thianghlim lo an siam erawh chuan khawtlang mai ni lo, ram tichhetu an ni thei. Rorelna dik zawnna leh Mizo hnam tana a thiltum tipuitling turin YMA hi 'pressure group' lo ni tlat rawh se.