PAWISA HMANGA PATHIANIN A FIAH DAN CHE

 - Rick Warren

- 26 January 2022

“Leia sulrul leh tuiekin a ei chhiatnaah, rukruten an reh pawha an ruknaah hian, in tan rote khawlkhawm suh u; vanah, sulrul leh tuiekin a ei chhiat lohnaah, rukruten an reh pawha an ruk hek lohnaah chuan, in tan rote khawl khawm zawk rawh u; i ro awmna apiangah i rilru pawh a awm ang” Matthaia 6:19-21.

Pathianin a fiahna che kawng khat chu pawisa hmangin a ni. Thil neih kawngah i rintlak a nih chuan hausakna tak tak nei turin vanramah pawh a ring ang che.

Pawisa hmanga Pathianin a fiahna che kawng hrang hrangte chu:

Pawisa chuan i thil duh ber a tilang:

I nuna thil pawimawh ber i hre duh a nih chuan, i calendar en la i pawisa hmanchhuah dan en bawk ang che. I hun hman dan leh i pawisa hman dan aṭangin i thil duh ber a hriat ṭhin a ni.

Matthaia 6:19-21 ah chuan, “Leia sulrul leh tuiekin a ei chhiatnaah, rukruten an reh pawha an ruknaah hian, in tan rote khawlkhawm suh u; vanah, sulrul leh tuiekin a ei chhiat lohnaah, rukruten an reh pawha an ruk hek lohnaah chuan, in tan rote khawl khawm zawk rawh u; i ro awmna apiangah i rilru pawh a awm ang,” a ti.  I rilru awm se i tihna apiangah i pawisa dah ang che, tichuan i sum peipunnaah chuan i phur leh zual ang.  

Pawisa chuan i innghahna a tilang:

Pawisa chu innghah nan i hmang ṭhin em, nge Pathianah i innghat zawk? I mimal hlimnaah i innghat nge, i hlimna turin Pathianah i innghat zawk? I nun khaw nawmna turin pawisaah i innghat nge, i nun khaw nawmna turin Pathianah i innghat zawk? Pawisa hi rinna fiahna a ni. 

Bible-in Thufingte 11:28 ah, “A sum ring mi chu a vuai ang a, Mi fel erawh chu hnim angin a duah ang,” a ti.

Pawisa chuan Pathian tan rintlak i ni em tih a tilang:

Pawisa chuan Pathianah i innghat em tih chauh a tilang lo va; Pathian tan rintlak i ni em tih pawh a tarlang a ni. Luka 16:10-12 ah chuan, “Tu pawh tlem te chunga rinawm chu tam tak chungah pawh a rinawm ṭhin; tu pawh tlem te chunga rinawm lo chu, tam tak chungah pawh a rinawm lo ṭhin a ni. Sum lem chungah mah in rinawm loh chuan, tuin nge sum tak chu kawltir ang che u? Mi dang ta chungah mah in rinawm tawh loh chuan, nangmahni ta chu tuin nge pe ang che u” a ti a.

I pawisa hman dan chuan Pathian malsawmna i dawn dan thlengin a nghawng a ni. Awle, tunah chuan i pawisa hman dan leh Pathian malsawmna a inzawmzia pawh i hrethiam ang, mumal taka sum leh pai i dawn theih nan Pathian dil la tichuan hausakna tak takah pawh Pathian tan rintlak i ni ang. 

Ngaihtuah zui atan

* I thinlung duhzawng engnge ni le? I pawisa hman dan chuan chu chu a thlawp ṭha em?

* Vawiinah hian i hna chan ta la, engnge i tih ang? Eng kawngah nge malsawmna i dawnna turin Pathian i rina, i rin loh?

* Engtiangin nge Pathian hausakna i hman dan aṭangin amah i rinna thuk tak a tihlan?

 [Lettu: Sangpuia]