PAWISA CHUNGCHANGA I TIH LOH TUR THIL PALI

 - Rick Warren

- January 25, 2022

“Fimkhur ula, awhna reng reng lakah chuan inveng rawh u; sum ngah hi mihring damchhan a ni lo ve” Luka 12:15.

Pathian chuan pawisa hman chungchangah ngaihtuahna fel tak nei turin a duh che a ni.

Isuan a zirtirte hnenah he thu pawh hi a sawi a (Luka 16). Mi hausa tuin emaw sum enkawltu a neih thu a sawi a, sum enkawltu chuan a sum enkawl chungchangah fel tawk lo a awm avangin ban a nih dawn thu a hria a, sum enkawltu chuan ruahmanna thar a siam ta a. Ban a nih dawn thu a hriat takah chuan ban a nih pawhin a hna enkawl theitu ṭhian an awm theihna turin ruahmanna a siam a, tichuan a pu sum batute chu a ko ṭheuh va, hriak tehkhawng za batu chu tehkhawng sawmnga a ziahtir a, chutiang zel chuan a ti a.

A pu chuan a hriat chuan, “sum enkawltu fel lo chu a remhriat a vangin a fak ta a; eng fate aiin he khawvel fate hi an tunlai kawngah chuan an fing zawk a ni” a ti a Luka 16:8.

Isuan sum enkawltu rinawmlohna kha a fak reng reng lo, amaherawhchu a remhriatna kha a fak a ni. Engnge remhriatna chu? Remhria nihna chu fing, fel, ṭangkai tihna ani ang. Harsatna chu chiang takin i hmu a, eng nge i tih tur i hriat a ngaia, tichuan engtia chinfel tur nge tih i ngaihtuah a ngai bawk a ni. Pathian chuan Bible aṭangin sum enkawl kawnga remhriatna min zirtir a tum a ni. 

He tehkhin thu hian pawisa chungchanga kan tih loh tur thil pali min zirtir a ni.

I pawisa khawhral suh

Luka 16:1 ah chuan, “Mi hausa tuin emaw sum enkawltu a nei a; chu mi chuan a sum a khawh ralsak mai mai kawngah a hnenah an hek a.” I thil neih engkim mai kha pawisa tiamin Pathian pek che a ni a. Chuvangin i pu pawisa i hman kawngah i fimkhur tur a ni a, i khawhral mai mai tur a ni lo vang.

Pawisa hmangaih suh

Pathian hi i nunah i dah hmasaber nge sum peipun hi i dah hmasaber zawk tih thuthlukna i siam a ngai a ni. Thil pahnih hi a hmasa berah i dah dun thei lo vang. 

Bible chuan, “Chhiahhlawh tu mahin hotu pahnih rawng an bawl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang, Pathian leh sum rawng in bawl kawp thei lo ve,” a ti a Luka 16:13.

I pawisaah innghat suh

Pawisa engzata tam pawh nei mah la, engtik lai pawhin i chan thei reng a ni. Sum enkawltu chuan rang takin chu thu chu a hria a, Luka 16:3 ah chuan, “Ka puin sum enkawltu atanga mi ban dawn hi engtin nge ka tih ang aw?” a ti a ni.

Innghahna tlaka awm i duh chuan, i nun laimu chu laksawn mai mai theih a ni tur a ni lo. I hloh mai mai theih loh tur thil pakhat chiah a awma: chu chu Pathian hmangaihna hi a ni.

I pawisain i lung a tihawi inbeisei suh

Pawisa i ngah poh leh i hlim zuala, innghat ngam lehzual leh hlu lehzual anga i inngaih tlat chuan, nasa taka hruai sualin i awm tawh tihna a ni.  “Tangka sum ngainatu chuan tangka sumah a duhtawk a hmu lo vang a, hausak ngainatu chuan duh tawk a hlep hek lo vang. Hei pawh hi engmah lo mai mai a ni” Thuhriltu 5:10.

Chuvangin Isuan Luka 12:15 ah, “Fimkhur ula, awhna reng reng lakah chuan inveng rawh u; sum ngah hi mihring damchhan a ni lo ve” a ti a ni. 

Ngaihtuah zui atan

* Pawisa zawng zawng hi Pathian ta a ni tih i hre ta a engtin nge chung i pawisa te chu i hman tak ang le?

* Miin i nun leh i pawisa hman dan lo en che sela, i nuna thil pawimawh ber chu eng nge ni an tih ang?

* I tum tisang tho si a, i pawisa lakluh zata lungawi tho dan engtin nge i zir ang?

 [Lettu: Sangpuia]