Aizawl | January 19, 2022: Member of Perliament (LS) C Lalrosanga chuan nimin ni 18.1.2022 (Thawhlehni) khan Northern Frontier Railway-in Khamrang leh Sihhmui inkar rel kawng an siam mek a hmunah kalin Khamrang Station atanga rel kawng kalna tur leiverh zawh tawh te, leidawh lai te, leidawh sang tak tak te leh Mualkhang leh Sairang Rail Station siam hna kal lai mek te chipchiar takin a enpui.
Pu C. Lalrosanga chuan Parliament thlasik thutkhawmnaa helai relkawng chungchang zawhna a lo zawh tawhte Railway Minister Pu Ashwini Vaishnaw-in a lo chhan tawhte bawhzuiin Railways lam hotute chu relkawng siamna hna thawh a nih dante a sawipui bawk. Pu Rosanga chuan Railway hotu leh hnathawktute chu a sur a sa hnuaiah rim taka hna hautak an thawh avangin lawmthu a hrilh a. Sairang thlenga relkawng siam hna hi thawh zawh a nih hnuah pawh Mizoram chhim lam thlenga survey lo tih tawh anga relkawng kaltir tuma hmalak a tuma ni a ti.
Hnathawh enkawltu Dy. Chief Engineer Pu Harjimal Meena chuan an hnathawh dan te chipchiar taka hrilhin, an hna thawh tawh leh thawh mekte leh harsatna an tawhte a lo sawipui a ni. Helai rel kawng March, 2024-a siam zawh hman an tum chu December, 2023-ah zawh hman an tum a ni tih MP hi a lo hrilh bawk a ni. Rel kawng enkawlna kawnga Consultant Pu Hrangtawna pawhin Rail kawng siam chungchangah hian working season a rei loh em vang leh zangnadawmna buaipui a ngaih thin avangin duh angin hna a thawh chak theih loh thin thu MP hi a lo hrilh bawk.
Relkawng ennaah hian Pu C. Lalrosanga hi Pu Hrangtawna, Consultant leh NFR Dy.Chief Engineer leh railway engineer ten an tawiawm a ni.
- DIPR
Post a Comment
He post chungchanga i ngaihdan lo sawi ve rawh: