I NGAIHTUAHNAIN A HNUNGTAWLHTIR CHE CHUAN

- Rick Warren

- 19 January 2022



“In rilru puthmang chu, Isua Kristan kan hnena a lantir tawh ang kha ni rawh se” Philippi 2:5 (TLB)

I nunah hlawhtlinna chan i duh chuan, i rilru puthmang thunun dan i zir thiam a ngai a ni. I rilru a  buaia, i ngaihtuahnain a hnungtawlhtir che chuan, duhthlan tur pahnih i nei. I rilru i thlak emaw i chet pawp emaw a ngai dawn a ni.

A chang chuan i rilru i thlak a ngai

I thil ngaihtuahte kha a chang chuan a ṭhalo em em a, midangte chhiatna, rilru natnate a ni. A ṭhalo hle a, i thiltih theih awmchhun chu ngaihtuahna thlak a ni. 

“In rilru puthmang chu, Isua Kristan kan hnena a lantir tawh ang kha ni rawh se” Philippi 2:5 (TLB).

I rilru puthmang chuan i ngaihtuahna thlengin a huama – chuvangin i ngaihtuahnate chu Isua ang ni rawh se. Hetiang hian i inzawh ve a ngai. “Hetiang dinhmunah hian Isuan engtin nge a hmachhawn ang? Thingpui dawr nghaktu chu a hau ve mai ang em? Hau lo e. Kha mi kha Isuan a ankhum ve mai ang em? Ankhum lo e. Isua chu zankhuaa inhrosain inhum ruhin he thil hi a tih mai i ring em? Ring lo e. Isua chu hlauhawm takin a chet i ring em? Ring lo.

I rilru puthmangin Isua a chawimawi lo a nih chuan chawplehchilhin thlak nghal rawh. Isuan a kawppui a enkawl dan tur ang zelin nang pawhin ti ve rawh. I rilru ṭhalo chu paih la, Isua rilru puthmang tur zel chu ngaihtuah ang che.

A chang chuan i rilrua thawh dan anga i chet angai

Ka fapa Matthew-a a thih khan, i hriatthiam theih anga lusunna avanga lungngai tawpkhawkin kan awm a. Mahse kei leh ka nupui chuan a tir aṭang khan lusunna chuan ṭhatna leh tawrhna chu midangte ṭanpuina tura ṭangkai tur zawnga ngaihtuahna sen kha kan tum tlat a ni. Chumi avang chuan Saddleback Kohhranin kumtin rilru lama damlohna (mental illness) inkhawmpui kan huaihawt thei a ni. Harsatna ka paltlang te hi a thlawnin ka liamtir dawnlo. Thil ṭhazawk atan hman ka tum tlat a ni.  

I rawngbawlna hlawhtling tak chu i chakna leh i hlawhtlinna aṭangin a lo chhuak lo vang. I rawngbawlna hlawhtling chu harsatna thuk tak aṭangin a lo chhuak ang.

Eng rilruin nge vawiinah hian pawt let mek che? Sawi chhuak rawh. I rilru chu thlak ngai a ni nge, paltlang ngai a ni nge, thutlukna siam la, tichuan thil ṭha a lo chhuah theih nan hmang ṭangkai ang che.

Ngaihtuah zui atan

* Eng vangin nge Isua duhdan ṭawmpui ai chuan mahni rilru puthmang chu kan ṭawmpui fo zawk ṭhin le?

* I rilru i thlak chang emaw i rilru anga i kaltlangpui chang kha han ngaihtuah let la. Chu i tawnhriat aṭang chuan engnge zirchhuah i neih le?

* I nuna harsatna i lo paltlang tawh midangten ṭanpuinana i hman theih a awm em?

 [Lettu: Sangpuia]

Post a Comment

He post chungchanga i ngaihdan lo sawi ve rawh:

Previous Post Next Post