I INVENNA ATAN PATHIAN RING RAWH

 Rick Warren

5 January, 2022



“Mi dotute mit hmuhah ka hmaah hian dawhkan i buatsaih ṭhin a; ka lu hi hriak i thih tawh a; ka novah hian a liam reng a.” Sam 23:5

Engtin nge michaltlai deuhte i hmachhawn ṭhin? Hmachhawn suh. Pathian kutah dah ang che. A ni chu i invenna lo ni rawh se.

Changkanna hian hawihhawmna a hloh tial tial tih hi i hrethiam ve tawh maithei e. Khawvel hi a chaltlai zual zel a ni. Internet hi nasa takin a inrawlh bawk a ni. Internet chuan mite chu an hmel lang lo pawhin a thukru thei a, tichuan hmaichhana midang bula an sawi ngam loh tur tam tak a sawitir ta ṭhin a ni.  

Chutianga ti te chuan an rilru têtzia an tilang mai a ni. Rilru tê te chuan midang an deuhsawh a, chu chuan an rilru a tihnawm phah deuh an ring a ni.

Mi rilru zau te chuan midang an ti lawm zawk ṭhin. Lal Davida kha hetiang lamah hian a fakawm hle a ni. Rilru, ṭawngkam leh taksaa beihna kha a hrethiam tlat a ni. Tlangval mai a la nih lai khan zawlnei Samuela chuan Israel lal dawt chiah ni turin hriak a lo thih tawh a, mahse Davida chu, Lal Saula, amah tihhlum tumtu hlauva tlanchhiain kum hnih chhung a hun a hmang a ni. A hnung lama sawisel rawn luai luai a nih laiin pûkah a biru a ni.  

Mahse Davida chuan Saula chungah ṭawngkam bawlhlawh engmah a hmang lo; a thungrul ve ngai lo bawk. A rilru ang pu lal ni turin Davida chu Pathianin a buatsaih a ni.

Davida chuan heti hian a sawi a ni, “Mi dotute mit hmuhah ka hmaah hian dawhkan i buatsaih ṭhin a; ka lu hi hriak i thih tawh a; ka novah hian a liam reng a.” Sam 23:5

Davida chuan a chunga Pathian ṭhatzia a hria a. Pathian chuan a luah hriak a thih a, khawvel hmaah hetianga sawiin, “Hei hi ka mipa a ni! Tawlh kir rawh u! Lal thlaktu tur chu amah hi a ni” tiin. Davida no chu a liam renga, chumi awmzia chu, miin an beih pawhin, Pathianin mal a sawm chhunzawm reng tihna a ni.

Davida chu a rilru tawt lutuk puakkeh ang hial a ni em? Ni lo! Ama invenna atan a theihna te hman a ngai reng reng lo, a chhan chu Pathian chu a invenna tura a rintlat vang a ni.

Miin an beih che chuan rinna leh tlawmna nasa tak, Pathiana chawl leh innghat tur chuan pal tlang tur a awm a, miin an beih che a, i chungchang thu an sawi darh emaw an hriatthiam loh che emaw pawhin. Chutiang thil a lo thlen chuan, thil engemaw tak tih chu a chakawm ve ṭhin a ni.  

Mahse miin an beih che a i ngawih reng hian Isua i ang thei deuh ber a ni. Isua khan beih a tawk reng a, mahse a thungrul ngai lo – kraws kawng a zawhnaah pawh khan a ni. Amah hektute hmaah pawh a ngawi reng, a chhan chu Pa chungah a innghah vang a ni.

Bible chuan, “Pathian remtih zawng anga i tuar chuan, thil ṭha chu ti zel rawh, i nunna chu Pathian nangmah siamtu chungah nghat zel rawh, a chhan chu a tithlawn ngai lo vang che.” (1 Peter 4:19 NLT)

Pathianin a ti beidawng lo vang che. Vawiinah hian i invenna atan ring ang che.

Ngaihtuah zui atan

* Inhnialnaa thu hnuhnung sawi chu eng vang nge ṭul riau nia i hriat?

* Invenna atan Pathian i rinna chu taksa lamah engnge a hlawkna? Chu i thutlukna chuan i hriselna engtin nge a nghawng?

* Nangmah beitute chungah thusawi ngai ta sela, Pathianin eng nge sawi tura a duh che i rin? Engtiangin nge sawi la a duh che i rin?

*Pathian thutiam chhandamna chu i ring tawh em?*

Isua hnenah i nun i hlan duh chuan, hetiang hian ṭawngṭai rawh le:

“Duhtak Isu, ka sualna avanga nang nena kan inṭhenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, min chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a niilo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahni tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  

[Lettu: Sangpuia]

Post a Comment

0 Comments