DOROTHY NGE NGURPUII?

-          Dave Chawhte

‘Nguri ka rim tirh chuan Dorothy avangin December ka nih chiah tawh loh pawhin January emaw, February emaw tal chu ka ni ang. Kan han innei a, Ngurpuiin min ti April ta a ni.’ – (C. Ṭhuamluaia, Sialton Official)

Tetei Khawlhring

Dorothy hming lam chuan C. Ṭhuamluaia mitthlaah a lo lang vat a, Ngurpuiin a han zui leh ngat phei chu Sialton Official bak rilruah a awm tawh lo. Chutih rual chuan C. Ṭhuamluaia ziak Sialton Official thawnthu han chhui zui chiam ka tum chuang lo va. Amaherawhchu, Dorothy leh Ngurpuii kan buk dawn avangin kan hnuchhawn ngawt thiang chuang lo. Eng emaw lai lai chu kan ṭham tel zeuh zeuh dawn tho a ni.

Mi tinin thawnthu kan nei ṭheuh a, kan thawnthu hi a inang vek kher lo ang; mahse, a inzulna lai leh a inkaihhnawihna lai hi kawng eng emaw tal a awm ve zel a. Chung zingah chuan Dorothy leh Ngurpuii buk an ngaihna chhan pawh hi a tel ngei ang.

Sialton Official thawnthu hi thawnthu danglam bik a ni ve hrim hrim a, a chhiartu apiangte hi a zunin a phuar a, a ngaihno beina hian a zem thlu ṭhin ni berin ka hria. Mafaa Hauhnar chuan, “Sialton Official tih thawnthu tawi hi i chhiar a, i lung a kuai ve lo a nih ngat chuan lung lam fel lohna engemaw i nei a ni mai thei. Doctor rawn a, CT scan tih hial te pawh a ngaih ka ring,” a lo ti ve ngat tawh nia maw le!

Sialton Official thawnthu hian hringnun a phawk chiang ve em mai a, a zuna uai loh harsa tak a ni reng a ni. Tu pawhin han chhiar se, “E… hei chu, ka tawn ve tawh a ni ngat mai!” an tih ve ngei ka ring tlat. Mahse, engtiang takin nge maw hringnun chu a phawh chhuah le?

Mi tin mai hian Dorothy kan nei ve vekin ka ring. Dorothy, ‘Queen of the days I loved’ ngei mai kha! ‘Dorothy chu tu nge ni?’ tih leh ‘eng ang mi nge a nih?’ tih chu ilo ngaihtuah ve tawh atan dah ila. Tu pawh ni se, eng ang mi pawh ni se, i engkima engkim, i hmangaih em em a ni phawt ang. Inkawprem a rem lohna tam tak a awm ang a; mahse, ani chu i thinlung luahtu ber a la ni tho ang. C. Ṭhuamluaia’n, “Kei chuan lawn lova vana arsi lak ka tum a, ani erawh chuan leihlawn awm lo a zawng a ni,” a tih ang mai kha i chan a ni ve ang.

Ṭhenkhat Dorothy chu inhmangaih tawn em em chung sia an neih theih hauh si loh a ni ang a, ṭhenkhat Dorothy erawh engtik lai maha an ta ni ngai reng reng lo tur a ni ve bawk ang. Dorothy chu thlahlel em em mah se la, Dorothy chuan a piang ve a ni tih pawh a hre lo va. A Dorothy ngei chuan a hlutna takngial pawh a hre kher lo vang. Mahse, a hmangaih ve em em tho si a ni.

Dorothy zawng tawrh a har a ni ang e, Ngurpuii lo lan hnu pawhin a hming a ri awl lo chu a nih hi. Ani chuan min duhin min thlahlel ve em em pawh ni se la, a rem lohna kawng eng emaw tal a awm zel nia. Chawngfianga tan Lianchhiari a rem hleithei der lo va, Vawra leh Rintei lah an awm dun thei hek lo. Khuanu hian Dorothy nena awm dun tur hian mi a duang lo tak tak a ni mahna. ‘D – if you could see my heart, it is bleeding now – D’ tih a ngai leh ṭhin.

Sawi loh phal loh Ngurpuii a rawn lang ve leh a, ani zawng engkima engkim a ni. Sawisel bo tih mai tur khawpa ṭha leh fel a ni a, “Nguri zawng, ka lungawi loh hlau reng reng ṭhin a ni,” kan ti leh mai ṭhin zawng a nih hi!

Ngurpuii hi chu kan hmangaih ni satliah lovin min hmangaih em emtu a ni tel a. Kan ṭhat tawk lohna te, kan mawi lohna lai te min thuam mawisak zung zung tura khuanu’n kan tana a ruat a ni ta ve ang. A hmangaihna kan hre thiam lo fo va, Dorothy zun avangin Ngurpuii hmangaihna kan haider phah fo. Mahse, ani chuan a tuar hram hram a, thlasik khaw vawt vin tuk ang maia vawt vin kan nih lai pawhin min dawm hram hram zawng a nih hi. A chhel ngawt mai.

Kan hringnuna Dorothy chu kan hmu mai a, amah buaipuiin kan hun zawng zawng kan khawh ral \hin a ni ber. Chung hun chhung zawng chuan Dorothy phenah Ngurpuii hi a lo ding ngawi ve reng zel a. Dorothy chauh kan ngaihtuah avangin Ngurpuii chu kan hmuh kan ta ṭhin a ni.

Kan nihphunga bet hrim hrim a nih vang nge kan rilru a dik tawk loh vang zawk? Dorothy a awm loh chauhin Ngurpuii hlutna kan hmu thiam a, Dorothy a lo lan leh veleh kan theihnghilh leh mai ṭhin. Ngurpuii hi zawng a awm loh hnuah chauh a hlutzia kan hre dawn a nih hi!

Ka han sawi chiam tak naa, Dorothy leh Ngurpuii hi han buk tak tak hleihtheih an nih lohzia chu kan chiang tlang ṭheuhin ka ring. Hetia han sawi mai hi chuan Dorothy a rem dawn loh rau rau chuan Ngurpuii lama insawrbing mai awm han tih mai theih a ni a; mahse, Dorothy zawng Dorothy kha a lo ni leh ṭhin. Chutih laiin Ngurpuii kianga awm erawh hah a dam a, na zawng zawng hi a dam ta emaw tih mai a awl.

Buk an harsat em vang hi a ni ngei ang, kei pawhin ka la buk fel hleithei bik lo va. Pakhat zawk hian uai fual chang nei mah se, a uai fual rei hman meuh lo. Eng pawh ni se, hei hi chu mahnia chinfel atan dah mai teh ang. Hei erawh lo ngaihtuah ve la – ‘Dorothy nge Ngurpuii?’ Hringnun thawnthua zawhna chu!