Chief Minister hovin Covid-19 chungchangah inrawnkhawm

• State pawn atanga lo lutte endik khauh taka kalpui tum!




Aizawl | January 12, 2021: Covid-19 hrikai an pun leh tak avangin leh Omicron variant lo lut mai thei dinhmun a Mizoram a din avanga hmalak zel dan tur chungchangah vawiin khan Chief Minister Pu Zoramthanga hoin Assembly Annexe Conference Hall-ah inrawnkhawmna neih a ni a. Political party hrang hrang aiawhte, NGO leh kohhran aiawhte, MJA leh zirlai pawl aiawhte, AMC, Local Council leh Village Council aiawhte, hospital leh medical association aiawhte an tel a ni.


Chief Minister Pu Zoramthanga chuan COVID-19 hrilengin hun rei tak khawvel pum a tihbuai hnuah nunphung pangngaia let leh theih kan inbeisei laiin, tunah Omicron variant, variant awm tawh dang zawng aia inkaidarh awlsam a lo awm leh takah chuan ram changkang zawkte pawh inkharkhipin, India ram khawpui dangte pawh zan curfew leh inkhuahkhirhna hrang hrang an kalpui leh tak thu a sawi a. Mizoramah chuan kum hma lama sawrkar, Kohhran, NGO leh mipuite zinga thawhhona tha tak lo awm tawh avanga hrileng kan lo do tawh danah lawmthu sawiin, tunah pawh hian thawhhona tha tak nen he hrileng hi hmachhawn zui zel turin kalkhawmte leh mipui a sawm a. Theihtawpin sawrkar chuan a tih tur, tha nia a hriatte chu a tih zel tur thu a sawi a. Vawiin inrawnkhawmnaa rawtna tha tak tak lutte chu Covid hri leng dona leh a laka invenhimna tura ruahmanna siam belh zelna tur atan a tangkai tur thu a sawi.

H&FW Minister Dr. R. Lalthangliana chuan theihtawpin sawrkar chuan hri inkai darh zel tur laka hma a lak zel tur thu leh, mipui tawiawmna a pawimawh thu a sawi a. Covid Appropriate Behaviour te tha tak zawm a tul thu te sawiin, vaccine la thei, la la lo te chu la thuai turin a sawm bawk.

COVID-19 case a pun zel avanga lohtheihloh a inkhuahkhirhna siam belh a ngaih takah chuan heng SOP te hi mitin in tha takin zawm se, Lockdown pui pui kalpui ngai dinhmun kan thlen loh hram nan SOP zawm thain, mitin Covid Appropriate Behaviour (mask vuah that, kut tih fai ngun, midang nena inhlat a awm) te hi uluk zawka zawm a pawimawh thu sawi a ni.

Vawiin inrawnkhawmnaah hian rawtna hrang hrang lut zingah state pawn atanga lo lutte endik khauh taka kalpui te, Covid 19 SOP rualkhai taka district tina kalpui te, tha zawka mask vuah tura inzirtir leh, hrileng chungchanga mipui hriat tur leh inhrilhfiah ngai te inhrilhhriatna ngawrh zawka kalpui te, test ngawrh zawka kalpui a tel a ni. Health Department official pawimawh te atanga report ngaihthlak a ni bawk a. Tun Krismas leh kum thar vuak vetah khan symptom nei, in test si lo an awm chu hri kai punna chhan pakhat nia an rin thu an sawi.

He inrawnkhawmnaah hian Speaker Pu Lalrinliana Sailo, Health & Family Welfare Minister Dr. R. Lalthangliana, Home Minister Pu Lalchamliana, I&PR Minister Pu Lalruatkima, Health & Family Welfare Board Vice-chairman Dr. Z.R Thiamsanga te he meeting-ah hian an tel a. Chief Secretary Dr. Renu Sharma bakah Finance Commissioner, Home Secretary, H&FW Secretary, DC Aizawl, SP Aizawl aiawh, I&PR Director-te an tel bawk a ni.





Post a Comment

0 Comments