RILRU INNGAITLAWMTE HNEN-AH

(Krista a rawn inlar ta.)

๐Ÿ–Š️Remmuana Chawngthu๐Ÿ“’

Hripui leng karah, ni a liam zel a, a ngaite bawkin tlangsam par var mawi tak a lo vul leh a, sikni eng boruak nuam tak lo thleng lehin; Hringnun ipik leh rit takte paih bo rihin, Lal piancham hun lawmawm thleng leh theiin kan awm leh ta, min hruaitu fakin awm rawh se.




_"Ka Lalpa pian hretute chu,_
_Mi tlawm tak tak, berampute,_
_Khaw chhak mifing, thinlung tihtlawm,.."_

Hmun tlawm tak, ranthlenga Lal Isua pian thu kha khaw chhak mifingte leh berampute hriattir an ni tlat mai a ni.

A hun lai thilah chuan berampute chu mi tlawm tak hmuh a an hmuh sa a ni a,anmahni pawh an inhmu tlawm sa แนญhin tlangpui. Mifingte erawh chu engtik hun lai mahin khawi hmunah pawh hmuh hniam an ni ngai lo: Mahse, hemi แนญuma mite hi chu an thinlung tihtlawm an ni tlat mai.

Lal Isua lo piang hi mi inngaitlawm sa bakah milian leh sang tak nichunga thinlung tlawm tak chunga lo dawnsawn tur a ni tih hi a va lang chiang em!

Chaponaa khat tlat, chapo miah loa inngai, midangte tlawm tura phut ching, mahni tlawm duh chuang hlek lote kan nih chang a awm fo a; midang chapona ngai thei lo tawk chiaha inngaitlawmna dawrawm tak neite kan ni awm e; tlawm ral raih nun neitu Lal Isua lo piang hi hmuah dan dik hriat a va แนญul em!

A lo pian tirhin chapona nen Judai ram lal Heroda'n a lo hmuak a, a puitlin hnua rawng a bawlin pharisai leh lehkha ziaktu- dik leh fel nia inngai ten an lo hmuak ve thung. Mahse, chung mite dal zawh rual a ni lo tih hretute kan ni.

Inngaitlawm taka lo dawngsawngtute nen a Lalram a zauh zel a, khawvelin a hre zel chu a nih hi.

Beramputen an beram ven lai kalsanin Lal piang hmu turin an thawk chhuak a, hmanhmawh takin an kal thuai thuai a. Mifingte erawh chuan thilpek hlu tak tak kengin, an robawm hawngin, rangkachak, beraw leh murra te nen Lal piang an hmuak thung.

Lal lo piang hi a thil pek hlu tak takte, kan neih rohlu ber thinlung hlan a lo hmuaktu tur kan nih rualin, keimahnia paih leh kalsan ngai tam takte kalsan chunga lo hmuak tur pawh kan ni tel tih kan hriat a va pawimawh em!

_"Van ropuinate hlipin,_
_Kan zingah a lo piang ta.."_

Post a Comment

0 Comments