Judaten Messia an Beisei Dan

- K Remruatfela

Kristiantena kan hun pawimawh ber, min chhandam tura kan Lal, Isua Krista pian cham ‘Krismas’ chu kan lo thleng leh dawn ta reng mai a. Hla phuahtuin, _‘Lal pian hun pangpar a vul leh ta, thinlai mu hnu lunglen a kaitho e’,_ a lo tih vawng vawng angin mi tam tak thinlung mu hnu a kai tho a, hun kaltate thlirkirin an lungduh kal ta te a ngaihtuah chhuah tir a. Hei hi mitin thinlunga Krismas in hmun thuk tak a chan zia a tarlang chiang hle awm e.

Khawvel suala bo hnu chhanchhuak leh tura, Isua Krista a lo pian lai hian, Israel ram hi Roman empire chhung, Rom Sawrkar awpbehna hnuaia kun an ni a. Rom lal ram enkawltu lu ber chu Caesar Augustus an tih hi a ni. Hetih hun lai hian Rom Sawrkar hi khawvela Sawrkar lian ber an ni a. Khawvel zawng zawng hi awpbeh tuma an hmanhel lai mek a ni a. Chung an ram awp chhungah chuan Israel ram pawh hi a awm a. Isua pian laia Israel ram awptu chu Lal sual leh nun rawng, Lal Heroda an tih hi a ni. Historian ropui, William Dool Killen in a lehkhabu, *‘The Roman Empire at the Time of the Birth of Christ. Upwards of a Quarter of a Century Before the Birth of Christ’* tih-a a tarlan dan chuan, Isua pian lai hun bawr vel hi Rom empire chhunga Sawrkar inrelbawlna fel loh ber lai leh buarchuar ber lai a ni a. An ram lal ber, Ceaser Augustus hi nawmchen ngaina mi leh huau huau lawm mi a nih vangin an ram hausakna zawng zawng chu Lal leh a vuavang mi tlemte te chauhin an chhawr a, nawmchen nan an hmang a, hei vang hian an ram awpte pawh an enkawl tha hleithei lova, an hrek rethei em em a ni.

Chuti a nih vang chuan, Juda mipuite pawh an ram inrelbawlnaah an mangangin, he an saltanna lak ata chhanchhuaktu tur ‘Messia’ lo lan hun hi an nghakhlel em em a. Chu chu a ram mipuite chungah nghawng tha leh tha lo tam tak a hringchhuak a. Isua pian hun lai pawh hian Juda mipuite zingah pawl hlawm langsar tak pahnih – Pharisai kan tihte leh Sadukai kan tih te hi an awm tawh a. Pharisai kan tihte chu Juda dan khermei taka zawm tute hi an ni a, Isua phiarrutute an nih avangin sual hrim hrima ngaih tur chu an ni lo. Sakhaw mi tak an ni. Sadukai hote erawh Juda rorel pawl an ni a. An lu ber chu Puithiam lalber a ni a, mi tlemte thuneihna sang tak chelhtu bawr an ni. BC 67-a Rom General, Pompey`an Jerusalem a hnehchhuh atang khan Rom Sawrkar lak ata inlakhran duh pawl, Zealot an tihte pawh hi an lo inmung tan tawh bawk a. Isua zirtir zinga mi, Juda Iskariot-a pawh kha he hel pawl, Zealot zinga mi hi a ni.

Hetiang hi Isua pian laia Juda ram dinhmun a nih vangin Zawlnei tena Messia lo kal tur an hrilhlawk kha a taka thlen hun an nghakhlel em em a. An lal lo piang tur an beisei danah chuan, Jerusalem mi hausa chhungkua atangin lal ropui tak, Rom sawrkar awphbehna ata chhanchhuaktu tur, Lal Davida leh Lal Solomon-a ai pawha ropui leh thiltithei zawk, chakna leh thiltihtheihna hmanga an ram khaidingtu turah ngai a. Amaherawhchu, an chan loh khâna tlawm taka lal thar, Messia a lo piang leh ta si hi rin harsa an ti a. Juda mipuite zingah Chanchin Tha-in a tih en tam tak awm tawh mah se, vawiin thleng hian a hnam pum anga thlir chuan Isua Krista ‘Messia’ a nihna hi an la pawm thei lova, nghakhlel leh beisei tak chungin Messia lo kal tur an la nghak fan fan a, an Messia chu haiin ropuina Lalpa chu ‘Khengbet rawh’ tiin an au khum ta hial zawk a nih kha!

Keini, Zawlneiten an hrihlawk Messia chu, Isua Krista ngei hi a ni tih pawmtute hian Messia hi kan beng hriatna mei ni lo, kan thinlungah hian a piang tak tak em tih hi ngaihtuah ngun ngai tak a ni a.  Pathian hi kan duh zawng leh kan beisei ang angte min tihhlawhtlin sak a, malsawmna tinrenga min vurtu tur ang chauha kan ngai a nih chuan Judaten Isua Krista an hai ang khan kan thinglungah Isua Krista hi a lo la piang ve tak tak lo tihna pawh a ni thei ang. Fakna hlaa _‘Ka dil loh zawk malsawmna’_ tih hla kan ngaihthlak thin ang khan mihringtena tha kan tih dan leh kan suangtuah dan ang ringawt hi Pathian chatuan remruat a lo ni reng reng lova, rilru inngaitlawmte leh tlawmna nun nena, tuar huama Amah zuitute chungah chauh Messia hi a rawn inlar thin a ni. Chu Messia, Pathian fapa, Isua Krista chauh chu kawng leh thutak leh nunna a ni si a. Lalpa`n kan zaa tan mal min sawmsak rawh se. Amen!

Post a Comment

He post chungchanga i ngaihdan lo sawi ve rawh:

Previous Post Next Post