MZP-in an Pisa Pui khar; National/State Teachers Awardee leh NDA tling tharte chawimawina hlan

Aizawl | December 10, 2021: Mizo Zirlai Pawl (MZP) general headquarters Aizawl chuan vawiin chawhnu MZP Pisa Pui khar leh National/State Teachers Awardee leh NDA tling tharte chawimawina hun an hmang.

He hun hi Mizoram Chief Information Commissioner Lalnunmawia Chuaungo chuan khuallian niin a hmanpui a, MZP general headquarters vice president Andrew F Lalramnghaka'n a kaihruai.

Khuallian Mizoram Chief Information Comissioner Lalnunmawi Chuaungo chuan,  "Zirna hi zirlaite ram leh hnam hmasawnna atana chherchhuahna pawimawh ber a ni," a ti a. "Zirtirtu te hi nun kawng dik, thil dik leh dik lo, hriatna mai bakah nun dan mawi min zirtirtute an ni. Reiek-a High School ka kal laia kan zirtirtu chu ka ngaisang a, a la dam awm chhunte chu ka tlawhchhuak hram hram ṭhin a. Vawiina chawimawi Zirtirtute, mi dang tana fuihtu leh kawhhmuhtur ni turin duhsakna ka hlan che u a. NDA aṭanga zir mek leh zir chhuakte in kal zelna turah ka duhsakna ka hlan che a. Hetiang tlangval chhuanawm kan nei hi a lawmawmin Mizo leh Mizoram tihmingmawitu leh tithangmawitu ni zel turin duhsakna ka hlan a che u." a tu bawk.

MZP President Lalnunmawia Pautu chuan, "MZP chuan Mizote hming tiṭha a, tithangmawitute chu a chawimawi ṭhin a, Zofate tan a nih chuan chawimawi phu a chawimawi a, do ngai chu a do mai ṭhin a ni," a ti a. "Vawiina chawimawite hi MZP tan chuan in hming a dai tawh dawn lova, kan en zui reng dawn che u a ni," tiin,  Zirtirtu chawimawi te chu tha thlah lova zirlaite lo zirtir a, ram leh hnam hmangaihna nena bei zel turin a chah bawk a ni.

MZP President chuan, "MZP chuan Zofa hmun hrang hranga awmte tan theihtawp a chhuah ṭhin a, min awptute'n min ṭhen darh vanga ram hrana awmte tan hma a la fo ṭhin a. Vawiin pawh hian Assam state huam chhunga awm mek, Mizoram-a rinluh phuta hmalamektu Thangram Indigenious People Movement hruaitute kan zingah hian an rawn tel mek a, TIPM hian Mizoram a rin luh phutin hma an la a, MZP in theihtawpin a lo ṭawiawminna pui a, Sawrkar laipui-ah pawh hma a lakpui a ni." a ti.

"Thangram chhunga awmte hi  Mizoram chhunga rinluh an nih theih nan kan theihna zawnah ṭheuh kan puih a ngai a ni." a ti a.

MZP president chuan, Zirlai pawl 10 leh 12 exam turte, krismas hun pawimawh kan hmang dawn a, he hunah hian ram leh hnam nghahfak in ni tih hre renga inthlahdah lova, rilru leh tihtak zeta zir turin a chah bawk.

He hunah hian Mizoram aṭanga Zirtirtu National Awardee leh State Awardee bakah NDA a inziak tling te chawimawina an hman.