Ticker

10/recent/ticker-posts

MZP-in Leadership and Nationalism Training buatsaih

Aizawl  | December 9, 2021: Nimin chhun dar 12 khan MZP General Headquarters buatsaihin, Leadership and Nationalism Training cum Advent Christmas, Convention Hall Tourist Resort Reiek-ah neih a ni a. He hun hi Pu Andrew F. Lalramnghaka Vice President in a kaihruai. 

He hunah hian Pu Lalnunmawia Pautu MZP President chuan thu sawiin, "MZP din chhan lian ber chu, Zirlaite leh ram leh hnam tan a ni a. Ram leh hnam damna tur a nih phawt chuan theihtawp chhuahin MZP in hma kan la zel dawn a, hnam a ral aiin MZP hi a ral hmasa tur a ni tih hi MZP ngaihdan a ni" a ti a. 

"MZP hi zirlai pawl a nih angin, Zirna hi kan ngaihpawimawh hmasak ber a ni a. Chutih rualin, a tul huna sawrkar thawhpui a, a tul huna sawrkar sawisel ngam hi Pressure Group kan nih anga kan tih tur a ni" a ti bawk. 

Pu Salai Lianluai, Chin State Chief Minister pawhin he hun hi hmanpuiin, thu a sawi a, "Mizoram mipui zawng zawng, Kohhran leh NGO ten Myanmar raltlante min dawnsawn danah leh min buaipuinaah kan lawm em em a. Myanmar mipuite aiawhin lawmthu ka sawi a ni. Chutih rual chuan kan hmabak hi a la ko hle a, Mizoram mipuiten min tawngtai pui a, min tanpui zel turin ka sawm che u a ni" a ti a. "Raltlan kan nih angin mi fel ber ber lo kal kan ni lova, khawtlang leh ram tana hnawksak zawnga khawsa kan lo awm palh a nih pawhin, hriatthiamna leh hmangaihna nen min enkawl hram hram turin ka ngen che u a ni" a ti. 

Resource Person, Pu SF David Ngursangzuala MZP Ex Adviser chuan, hruaitu ni tura hriattur pawimawh leh tangkaite a sawi bakah Ram leh Hnam tana zirlaite tih tur hrang hrang a sawi a. Kalkhawm ten hlawkthlak an ti hle. 

He hunah hian, MZP General Headquarters bakah College hrang hrang Students' Union Leaders, MZP Direct Sub Headquarters, Direct Branch leh  Hnampual zirlai pawl hruaitute an tel a. Air Rifle inkahsiak te neiin hun hlimawm tak hman a ni.
Post i hmuh dan

Post a Comment

0 Comments