Aizawl | December 5, 2021: Mizo film thar 'Call 112' chu nizan khan Vanapa Hall, Aizawl-ah premiere a ni a, mi sawm bik te nen a changtute leh buaipuitu te'n an en hova, hmuhnawm tih a hlawh a, beisei an nei sang hlawm hle!
Leitlang Pictures buatsaih 'Call 112' hi hripui vanga Zoram a inkharkhip ṭhup laiin pawn chhuak lo zawnga hmun pakhata siam zawh tum ni mahse, hun a kala boruak a zangkhai tak avangin a thawnthu ruangam ṭhenkhat siam danglamin, pawn lam lanna tur pawh siam belh a nih thu Director Mapuia Chongthu chuan a sawi.
CALL 112 hi emergency number a ni a, Mizoram Emergency number niin, heta call aṭanga thawnthu awm thei an siam ta a ni.
A thawnthu ṭhenkhat laiah nuih bawk bawkna tur awmin, han 'ehh' dualna tur lai a awm a, chutih rualin thin phu tirang thei lai a awm a, a thawnthu hruai kual a nih danah Mizo film ṭhenkhat, rin zawn theih ang ni lovin chan loh khanah mi a hruai lut a, a hmuhnawm dangdai hle a ni.
Nizana film en honaah hian Mizoram film industry leh entertainment lama mi hriat hlawh leh mi lar an fuan khawm hnem hle a. Hmuhnawm an tih thu leh sum lakluh lamah Mizo film industry bung thar a kai an rin thu mi ṭhenkhat chuan an sawi hlawm a ni.
Call 112 hi Dr Zarzosanga ziah niin, Mizo filma sulhnu nei ṭha ṭhah Mama Ralte, Eddie Tochhawng, Duati Ralte leh ruatruati ralte te an inlan a, Mizo Zaithiam David Zawma a inlan bawk.
He film hi Lersia Play-ah mipui en theiha dah tur a ni a, en manhla tak niin en ngei chi a ni.
Chhungkuaa en atan a him a, ṭhianhova en atan a him a, duh berte nena en atan pawh a him lehzel a, Kohhran upa ina han en mai a tan pawh a him a ni!
Explore Mizoram- a thu chhuahte awlsam takin telegram-ah dawng ve rawh le:
a va han ngaihnawm ve le. i ziak thiam bawk a. en tuk ang vel ka ni der mai sir
ReplyDeletePost a Comment
He post chungchanga i ngaihdan lo sawi ve rawh: