Mizo Film Award sem dawn; Ngaihven hlawh Mizo film industry pual Award chu!

Aizawl | December 3, 2021: Mizo film industry hmasawnna chuan rah duhawm a chhuah chho mek zel a, an pualin award hial sem a ni dawn ta - December 18 zan hian Mizo Film Award (MFA) chu sem a ni dawn.




MFA atan hian inbuatsaihna ngawrh takin kalpui a ni a, Sawrkar hnuaia buatsaih tawh tih loh ah chuan a vawi khatna tur a nih avangin a tha thei ang bera buatsaih tumin theih tawp chhuah mek a ni. Award sem turah hian category pariat vel a awm dawn a mahse, tihchaana la ni lo a, kat thar lamh hian a chiang thei turah beisei a ni.


Award dawng tura chhawpchhuahte hming puan a nih hnuah mipuiin vote hmangin an duh zawng an thlang thei dawn a, hei hian Mizo Film Award hi a tihlu zual dawn - social media lamah vote thlak theihna hi phochhuah thuai a ni ang. 

Mizo Film Award sem tur hian ngaihven a hlawhin tuipui a hlawh nghal hle a, a hlawhtlinna hmuh thuai beisei a ni.

Mizo film industry hmasawnna hmuh hmaih rual a ni lo, a zuanin a zuang a ni ber. Hripui len hnuah pawh Mizo film chhuak thar ber berte chu online-a en theih turin chhawpchhuah a ni a, mahni in lum a tangin man chawiin a en theih. Hei hian sum leh pai lakluh kawngah film siamtute nasa takin a pui a, Mizo film industry tan hmasawnna rahbi pawimawh tak pakhat a ni. 

Mizo film industry-in hma a sawn theih nana theihtawp chhuah thin - film siamtute leh a changtute puala award hial buatsaih a ni tur hi a lawmawm a, ngaihhlut a hlawh chho zelin a rinawm. Mizo Film Award hi Tlau Entertainment buatsaih niin, Y.K Solar ten an sponsor a ni.


Tlau Entertainment buatsaih Mizo Film Award sem hun tihchhian a ni ta - December 18, 2021 (Inrinni) zan khian Vanapa Hall-ah sem a ni ang. 
Mizo Film Award 2021-ah hian category hrang hrang eng emaw zat a awm dawn a, karleh lamah nomination hi puan a ni ang - tun lai Mizo film lar ber berte chu award dawng thei tura chhawpchhuah an ni. Mipuiin an duh zawng vote hmangin an thlang thei dawn bawk. 

Award semna hmun tur hi Aizawl hmun laili leh mipui thahnem zawk punkhawm theihna tur Vanapa Hall a ni dawn a, film lama tui mite tan hun 'special' bik a ni ang. Hollywood leh Bollywood te nen tehkhin rual la ni lo mah se, Mizo film industry-in nasa takin hma a sawn tih hai rual a ni lo. An tha leh zung ngaihtuahna tam tak senga film siamtute leh a changtute tana platform buatsaih a ni tur hi a lawmawm hle a ni.

Award semna programme hi local TV-ah live-a pekchhuah a nih dawn bakah, YK Official YouTube channel-ah live-a pek chhuah a ni ang.

Post a Comment

He post chungchanga i ngaihdan lo sawi ve rawh:

Previous Post Next Post