Mizoram sorkar chu 1875 BEFR notification ah a ding nghet, Assam lam hi 1933 notification ah an ding thung - Home minister
Aizawl | December 7, 2021: Vawiin chhun dar 11:00 khan Home Minister Pu Lalchamliana chuan Synod Multipurpose Training Center Hall, Mission Vengthlangah lehkhabu - ‘Mizoram leh Assam Ramri Buaina’ a tlangzarh.
He lehkhabu hi Mizoram leh Assam ramri buaina chungchanga ziaktu mithiam hrang hrangte thuziak lakkhawm niin Pu Lalthuamliana, Asst. General Manager, SBI (Rtd) in a buatsaih a ni.
Minister Pu Lalchamliana chuan, Mizoram sorkar chu 1875 BEFR notification ah a din ngheh thu sawiin Assam lam hi 1933 notification ah an ding thung a ni, a ti a. Ramri chingfel tur chuan pakhat duhdan ngawt a tlang thei lova, lehlam lehlam inrem a ngaih avangin chinfel a awlai lova, India ram leh ram dang inrina buai te pawh hun rei tak buaipui hnuah pawh chinfel theih a ni rih lo, a ti a. State ramri chingfel tur pawh hian Boundary Commission din te pawh awm mah se ramri chinfel tak tak hi chu a har an ti ve hle a ni a ti.
Minister chuan 2018 February thlaa Zophaia Mizo zirlaite buk sak Assam sorkarin a rawn thiah sak a, silai hmet puaka kan zirlaite an rawn um darh vak hnu khan Mizoram sorkar chuan ramri chungchang ngawrh lehzuala buaipui turin Chief Secretary kaihhruaiin Core Committee a din a; chumi hnuah sorkar lo ding tharin Dy. Chief Minister chairman na hnuaiah Boundary Committee dinin member te pawh a huamzau thei ang ber tura ngaih angin Political Party tin te leh NGO pawl lian te tel kim thei ang berin a din a ni, a ti a. Heng Committee ten ramri chinfelna atana lehkha pawimawh (document) lakkhawm leh an hna thawh tawh chin te sawiin Mizoram sorkar chuan a duh angin a tanhmun tur te tichiangin document te pawh a nei tha thawkhat tawh a ni a ti a. Ramri buaina chungchangah Political Party leh NGO hrang hrang aiawha Boundary Committee a tel te pawh an lungrual tlang viau a, a tul anga inbiakna nei tura Mizoram sorkar a inpeih tiin a sawi a ni.
Khuallian hian ramri buaina chungchanga document hlu tak tak la khawma lehkhabu rintlak tak buatsaihtu Pu Lalthuamliana hmalakna hlu a tih zia leh ramri veituten an chhawr tangkai hle a beisei thu a sawi a ni.
Mizoram leh Assam Ramri Buaina bu-ah hian mithiam hrang hrang te thuziak bakah hian document pawimawh tak tak - Report of the Facts Finding Committee on the Northern Boundary of Mizoram (Dec 1973) by Rev. Zairema and B. Poonte, Memorandum submitted to the Prime Minister of India on the subject of Settlement and Demarcation of Northern Boundary of Mizoram (02.01.1974), Memorandum to the Prime Minister of India for setting up of Boundary Commission (2018), 1875 Notification, 1933 Notification – te leh a dangte dah tel a ni.
Lehkhabu tlangzarhnaah hian ramri chungchang sawihona hun hman nghal a ni a, Dr. Joseph K. Lalfakzuala, Asst. Professor, Govt. T. Romana College in sawihona hun a hawng a ni.
- DIPR
Post a Comment
He post chungchanga i ngaihdan lo sawi ve rawh: