YMA Ramhlun South Branch 'KAWTKAI LIBRARY' hawng

Aizawl | November 25, 2021: Tukin zing Dar 7:30 khan ,YMA Ramhlun South Branch 'KAWTKAI LIBRARY' chu Ramhlun South Local Council chairman K Lalduhawma'n a hawng.



Kawtkai Library hi YMA Ramhlun South Branch Library & Documentation Sub-Committee buatsaih niin, tun hi a thawhhnihna a ni a. Nikum 2020 Lockdown lai khan mipui rilru chawh phurna atan leh lehkhabu chhiar tam Awareness atan kalpui tawh niin Lehkhabu  an chhiar duh zawngte sawrkar SOP zawm chunga an kawtkai-ah pe ṭhinin, hlawhtling taka kalpui a lo ni tawh a 'Kawtkai Library Version 1.0' ti a vuah a ni.


Kuminah a chhunzawmna, 'Kawtkai Library Version 2.0' ti a vuah hi mipui a duh apiangin a thlawna an hawha an chhiar zawha an dah let leh mai theihna turin hma an la leh a, a bul tanna atan Ramhlun South M-section ah hawn phawt a ni a, Section dang Y &. A ah te kumin chhungin hawn leh hman an tum niin EXPLOREMIZORAM.COM chuan thu a dawng.


He kawtkai Library ah hian lehkhabu dahna siamin chutah ṭang chuan a duh tan lehkhabu dah leh lakchhuak mai turin a awm a ni.

Tukin a Library hawnna hi YMA Ramhlun South Branch -, Library & Documentation Sub-Committee chairman Tv. B. Lalmalsawma'n a kaihruai a, Tv. Joel Zomawia, Secretary in Report a pek hnuah Pu K. Laduhawma, LC Chairman hian hawnna neiin thu tawi sawina hun a hmanga, Lehkhabu ṭha chhiar tam hi khawtlang leh ram hmasawnna atana thil tha tak a nih thu leh he hmalakna avanga lawmawm a tih thu leh library tih changtlunna atan hmalak pui zel a tum thu a sawi.

Tuna hawn tak Kawtkai Library-ah hian mipui a duh apiangin a thlawnin lehkhabu an hawh thei a, an chhiar zawhah dah let leh mai zel dawn a ni.

Hetiang deuh hian Lalhruaitluanga Chawngte hi an in kawtah library te a lo siam tawh a, PUC pawhin an college campus ah siamin, YMA ITI veng branch pawhin an veng lun laiah 'nghah loh library' an lo siam tawh bawk a ni.
















Post a Comment

1 Comments

He post chungchanga i ngaihdan lo sawi ve rawh: