SCHOLARSHIP | Zirlai 10k+ account-ah pawisa thun tawh; MZP-in nawrh huaihawt tum ṭhulh

Aizawl | November 23, 2021: Post Matric Tribal Scholarship 2nd Installment (2020-2021)  chu thun mek niin, MZP chuan an hun tiam chhunga zirlaite account a thlen hman avangin naktuka nawrh huaihawt an tum chu an ṭhulh.




MZP chuan Post Matric Tribal Scholarship 2nd Installment (2020-2021) thun mek chu a hmunah vilin a thutchilh a. Zanin dar 10 thleng khan mi 10506 te bank account-ah thun tawh niin, thun chhunzawm zel a ni a. Rokhawlhna leh harsatna dang a awm loh chuan naktuk ni 25 November, 2021-ah hian a luh vek hman beisei a ni, tiin MZP thuchhuah chuan a tarlang.

Post Matric Tribal Scholarship 2nd Installment hi mi 17303 te dawn tur niin, hun rei tak chhung nghah a ni a. MZP General Headquarters pawhin thuchhuah siamin, ni 24 November, 2021 tlai dar 4 thlenga zirlaite bank account-ah a luh loh chuan CM Bangalow tualah lungawilohna lantir nise a ti a. Hetianga zirlaite bank account a thun a nih tak avâng leh, zan dar 9:30 thlenga mi 10506 te bank account-ah thun a nih avangin lungawilohna lantir tura tih pawh ṭhulh nghal a ni. MZP chuan he hmalaknaa theihtawp chhuaha thlawptu College S.U leh Hnampual hruaitute chungah lâwmthu a sawi. 

MZP chuan Scholarship Board hotute inpekna leh thawhrimnaah lawmthu a sawi a, Scholarship chhuahtlai avanga theihtâwp chhuaha hmalatu zirlai pawl dangte chungah pawh lawmthu a sawi tak meuh meuh a ni. 

MZP chuan kum lo kal zel turah zirlaiten a hunah tak scholarship an hmuh ngei theih nana hmala a, inhmakhua tûrin thuneitute a ngen nghal a. Tuna 2nd Installment sem mek pawh hi sem zawh a nih hma loh chuan a enzui zel dawn a ni. 


_Issued by: MZP General Headquarters, Aizawl._

Post a Comment

1 Comments

He post chungchanga i ngaihdan lo sawi ve rawh: