Tlabung Khua-in Kum 150-na lawm


Aizawl, the 8th November, 2021: Vawiin khan Tlabung khaw din champha kum 150-na lawmna program chu Tlangliana Mual, Tlabungah buatsaih a ni a. Mizoram Legislative Assembly Speaker Pu Lalrinliana Sailo chuan khuallian niin lawmna programme a hmanpui. Tlabung kum 150 puala buatsaih Souvenir lehkhabu chu Speaker hian a tlangzarh nghal bakah Tlabung helicopter service bultan thuai anih tur thu a puang bawk a ni.


Bialtu MLA Pu Nihar Kanti Chakma chu Khual Thlengtu niin I&PR Minister Pu Lalruatkima, P&E Commissioner Pu H. Lalengmawia leh official dangte telin Tlabung leh a chhehvel khua mi thahnem tak kalkhawmin lawmna programme ropui tak hman a ni.

Pu Lalrinliana Sailo chuan Mizoram history-a hmun pawimawh tak luahtu Tlabung khua in kum 150-na lawm thei dinhmuna an awm chu a lawmpui takzet thu sawiin mipui kalkhawmte chu Sesquicentennial Celebration chibai a buk a. Tlabung chu khaw ropui tak, Mizoram kawtchhuah hmasa leh chanchin tha hrilna hmun pawimawh hmasa, hnam hrang hrang in unau taka chenhona hmun a ni tiin hun lo kal zel turah pawh tangrual taka ke pen tlang zel turin kalkhawmte a chah a ni.


Thalaite hnenah fuihna thu sawiin Tlabung khua dinhmun chawikang zel turin mawhphurna sang tak an nei tih hre reng chunga zirna kawnga theihtawp chhuaha, ruihhlo laka fihlim turin a chah a ni.

Speaker Pu Lalrinliana Sailo chuan kan ram economy than len zelna turin ram dang nena insumdawn tawnna tih hmasawn a pawimawh takzet a ni, a ti a. Hemi kawnga kan state hmasawnna turin amah ngei pawhin theihtawp alo chhuah thin tawh thu leh Bangladesh nena insumdawn tawnna tur buaipuiin Bangladesh ah vawi 5 kal tawhin Bangladesh Prime Minister hnenah alo thlen tawh thu a sawi a. Kawrpuichhuah leh a chhehvel chu international trade hmunpui pawimawh tak ala ni chho zel dawn a, hei hian kawng hrang hrangin hmasawnna ala thlen zel dawn a ni tiin he sumdawnna hmunpui ti hlawhtling tur hian Tlabung leh a chhehvel mipuite hmalak puiah a sawm a ni.

Bialtu MLA leh Khual Thlengtu ni bawk Pu Nihar Kanti Chakma chuan Tlabung tana ni pawimawh tak Kum 150 tlin lawmnaah Assembly Speaker Pu Lalrinliana Sailo, I&PR Minister Pu Lalruatkima, official-te leh lo kal zawng zawngte alo lawm a. Tlabung leh West Tuipui bial a hmasawn zel theihna turin a chhunga cheng mipuite tangruala theihtawp kan chhuah tlan a tul a ni tiin hmasawnna tlo leh daih rei nei zel turin mipuite thawhho puiah a sawm a ni.

Vawiin programme ah hian Tlabung leh a chhehvela cheng hnam hrang hrang ten an hnam lam te entirin program ropui leh hlimawm tak hman a ni.


Mizo Lalte kut atanga Mary Winchester (Zoluti) la let leh tura British sawrkarin a rawn tirh Thangliana (Lt Col TH Lewin) chuan Khawthlangtuipui Lawnglenga rawn chhovin, 9th November, 1871 khan Tlabung khua hi alo din ta a ni.

Lawmna programme hman zawhah hian Assembly Speaker Pu Lalrinliana Sailo leh amah zuitute hian Bangladesh nena kan insumdawn tawnna tur Kawrpuichhuah ICP Trade Centre hmun an tlawh bawk a ni.




EXPLORE MIZORAM
email: admin@exploremizoram.com

Post a Comment

0 Comments