Govt. Hnahthial College-ah Graduation Ceremony hmang; District Bawrhsap in a hmanpui

Aizawl | November 02, 2021: Vawiin chawhnu dar 1:00 khan Govt. Hnahthial College Student's Union buatsaihin an college auditorium-ah Graduate Pass tharte lawmpuina 'Graduation Ceremony' hman a ni a, he hun hi Pu R. Lalremsanga, District Bawrhsap chuan khuallian niin a hmanpui a, Graduate tharte hnenah lawmpuina Citation a hlan a ni.


Vanlalrinchhana, Vice President Student's Union kaihhruaiah thu sawiin Pu R. Lalremsanga, District Bawrhsap chuan kawng hrang hranga hmasawnna atan zirna hi a pawimawh hmasa a, kei pawhin zirna hi ka ngai pawimawh hle a, vawiinah graduate thar 22 lai mai kan District-in kan nei hi a lawmawm ka ti hle a ni tiin zir chhunzawm zel tura chahin duhsakna a hlan a, khua leh tui tha tak ni chhunzawm zel turin a chah bawk a ni. Hnahthial hi tunhma atangin zirna lama hmingtha thin a ni a, tunah erawh tan kan lak thar a tul leh ta hle tih a lang a, theih tawp chhuahin tan pawh kan la dawn a, tunah hian hripui Covid-19 avangin zirlai naupang ten an tuar nasa hle a, anni hi nakin lawka kan ram, kan khawtlang hruaitu la ni tur te an ni a, an zirna hi a pawimawh si avangin tunah pawh pawl sawm leh pawl sawm pahnih board exam turte chu offline-in classs kalpui nise tiin DLTF meeting chuan ruahmanna kan siam a ni Bawrhsap chuan a ti bawk.

Zirna bul tanna Primary leh Middle School zirtirtute hun remchang hmasa bera koh khawm a, thil pawimawh tul sawipui a tum thu pawh a sawi tel bawk. Bawrhsap chuan Faina leh thianghlimna kawngah te pawh tan kan la nasa em em a, District Fai ber nih kan tum tur a, hriselna kawngah pawh district hrisel ber ni turin theih tawp kan chhuah dawn a, Mizote hian zuk leh hmuam kan ti nasa em em kan ni a, zuk leh hmuam-ah hian tul lovah sum tam tak kan khawhral thin, kan hriselna dinhmun thlengin a tuar phah bawk nen zuk leh hmuam ti lo tura tan kan lak hi thil pawimawh tul tak a ni. Hnahthial khawpui chu khawpui thang mek a ni a, chutih laiin kan khawchhung kawng te erawh a la zim hle a, nakin kum 20/30 lo awm leh tura khawpui nuam tak chenna tlak ni tura tan lak hi a tul hun lai tak a ni a, Hnahthial mipuiten kan duh em em District khawpui kan ni takah hian mipuite pawhin kan rilru sukthlek kan thlak danglam a, rilru zau tak pu tura a beisei thu pawh a sawi bawk.

Govt. Hnahthial College Principal Pu K. Lalsangluaia tarlan dan in Govt. Hnahthial College hi kum 1979 a din a ni a, tun dinhmunah Teaching Staff 29 leh Non Teaching Staff 11 an awm mek a, zirlai 179 in admission an lak thu leh kuminah hian graduate thar zirlai 22 an awm tih a sawi bawk.

Post a Comment

He post chungchanga i ngaihdan lo sawi ve rawh:

Previous Post Next Post