Dec 16 - 18 chhungin Zofate Haw Runpui Thenzawl-ah

Aizawl | November 22, 2021: Zoram Thar Zofate Lairelna Inpui chuan ‘Zofate Haw Runpui/Hnam Inkhawmpui Thianghlim’ chu December 16-18, 2021 (Ningani - Inrinni) ah Zofate Pathian Biak inpui hmun, Kanan Phaipui, Thenzawl ah neih turin a tifel.



Zoram thar chuan chanchinbu mite kawmin, "He hun pawimawh takah hian kum tam tak ṭhendarh leh awpbehna hnuaia awm Zofate hnam khat kan nihna puan tur a ni ang." an ti.

Zoram Thar chuan he thil hi sawifiahin, Zofate hi thlah khat bul thuhmun aṭanga lo chhuak vek kan nih nemnghehna LUNG - Zofate Hnam Lungphun hawn a ni ang. He lungphun ah hian Zo hnahthlak chipeng hming zawng zawng a chuang kim vek ang. Hnam chi peng lung hrang hrang chu hnam aiawh Khual Zahawm ten an hawng ang a, thu an sawi bawk ang. Hnam chipeng tin aiawh ten inpumkhatna Jubilee dar an vaw bawk ang. Inkhawmpui thupui chu *"I thovang u khai I din teh tak ang u," tih a ni. Thupui hi Rev. Dr. Zaichhawna Hlawndo leh Upa C. Zairemmawia ten an sawi ang. 

Hnam lam leh zai te a awm dawn a, Zofa zaithiam lar tak takte an zai bawk ang. Heng bakah Mizoram pawn aṭanga Khual Zahawm te leh Mizoram chhunga NGO hruaituten thu an sawi bawk ang. Inkhawmpui tawpni ah khawvela Biakin lian ber tur Zofate Pathian Biakinpui lungphum phum a ni ang. Zofate haw runpui a nih angin Zofa a duh apiang hnam palaia tel turin sawm vek kan ni.






Post a Comment

0 Comments