KAN KRISTIANNA HI!

- Mizo Thinker

January 11, 1894 khân kan rama Missionary hmasa ber Sâp Upa leh Pu Buanga-te'n Sairang an lo thleng a. Heta ṭanga chhiar ṭana a kum zâ-na, Mizoram Gospel Centenary chu 1994 khân lawm a ni a. Kum zá zen zâwn Kristian chu puitling thawkhat hlê tawh tûra ngaih kan ni. Pâwl reng reng pawh hi kum 60 a tlin tawh chuan puitling hlê tawha ngaih a ni a; mihring pawh kum sawmngâ a nih lai hi 'Golden Age of Happiness' tih a ni ṭhin. American writer Hosea Ballou chuan, “Ṭhalaite tân chuan kum 40 hi kum upa a ni a; kum upa te tân erawh kum 40 hi kum naupang a ni,” a ti a. Thil chiang tak mai chu kum 50 kan tlin hian puitling ve thawkhat tawh hlê-a ngaih kan ni.


Kum 1898 August 31-ah Presbyterian Kohhran din a ni a. Kum 1903 March 13-ah Baptist Kohhran din a ni ve thung a. Kum 1916-ah Kâwlkhuma hovin Salvation Army din a ni veleh a. Roman Catholic kohhran hi kum 1925 din a ni a. United Pentecostal Church (NEI) chu kum 1950 ah din a ni veleh a. Vawiinah meuh chuan Mizoramah hian pâwl 70 chuang kan awm ta hem mai. A eng hi nge dik ber pawh hi ka hrethiam tawh lo. Khawvêlah hian sakhua hi 4000 chuang a awm a. Khawvêl mipui zaa 85% vêl hian sakhua kan nei niin an chhût a. Christianity, Islam, Hinduism, Buddhism leh Judaism te hi sakhaw lian zual 5 an ni.


 Kristian sakhua zuitu hi an tam bera, 2.382 billion vêl awma chhut a ni a. A dawtah Muslim niin, 1.907 billion vêl an ni a. Hindu sakhua zuitu/vuantu hi 1.161 billion vêl an ni a. Buddhism hi 507 million vêlin an vuan ve bawk a. Hei lo pawh folk religion tam tak a awm bawk a. Dik ber inti ṭheuh kan ni a, kan dik ber leh dik ber loh chu a vuantu/zuitu rilruah innghat ta se a ṭha awm e. Rinna a ni tawh miau a, rinna inzahsak hi a ṭha e. Kan nun ho-naah mi pawi a khawih lo phawt chuan eng sakhua pawh awm se a ṭha, vantlâng tâna a hnawksak loha, ram leh hnam tâna a pawi lohva, dân an bawhchhia a nih loh phawt chuan a ṭha vek e.

Thil vei deuh mai pakhat ka nei ve a. Mizoram ah hian Kristian 87.2% vêl kan awm a; 'Za a za' kan ni lo. Engpawh chu nise majority chu Kristianna tho a la ni. Kan ngaihpawimawh atâna ka duh êm êm chu kan chênpui sakhaw dang vuan tûte laka kan rilru put hmang leh kan chhawmchhaih dân hi a ni. Kristian kan nih chuan kan ngaihpawimawh êm êm tur chu 'Isua Zirtirna/Thu ken laimu (Ideology)' hi a ni. Kum 2000 liamtaa Isua thusawi ṭha tak tak te kha a hniakhnung zuitû te hian kan zâwm tak meuh êm?

Mi thianghlim Paula'n, “Tawtawrâwt hi mumal nei lova a rîk chuan tunge râl kâp tûrin inbuatsaih ang?” a tih angin, a zuitute hian kan zui ber Isua thu ken laimu zawm tak tak loa kan kal chuan kan chenpuite, kan unaute tân chuan kan hahthlâk ve khawp ang! Liberation theologian hmingthang tak James H.Cone chuan a lehkhabu 'God of the Oppressed (Rahbehte Pathian) ah chuan ti hian a ti a, 'The scandal is that the gospel means liberation, that this liberation comes to the poor, and that it gives them the strength and the courage to break the conditions of servitude,' a dik hlê a ni. 

Isua hnung zuitu tak tak chuan Isua zirtîrna a zâwm tûr a ni. Isua zirtîrna a zawm dâwn chuan a mihring puite a hmangaih a ngai, rethei te, rahbeh zâwkte a ṭanpui tûr a ni. A chênpui te tân mi hnawksak a ni tûr a  ni lo; ṭanpuitu a ni zâwk tûr a ni. Tûnah hian inenfiah ta ila, kan Kristianna hi chhuan tham khawp a ni em? 'Mizoram Kristian chu kan fel tâwk a ni, Isua hnung kan zui ṭha tâwk e' kan ti ngam em? Kohhran hian a tih tûr dik tak a ti a ni, mi rethei te tân kan theihtâwpin kan luangchhuak kan ti ngam em? Biakin ropui pawh kan duh hran lo, mi rethei ṭanpui leh khawtlâng nun siam ṭhat leh a chanchinṭha puan darh mai loh chu tih tûr kan nei lo kan ti ngam em?

Kan Kristianna hian lam tual chauh hi awh suh se, kan thlarau mi-na hian ṭhenawm te nêna kan inrél ṭhinna hi titáwp ve rawh se. Ṭhenawm te nêna kan innghirhona hi titâwp ve rawh se. Kan Kristianna hian ring lo te kan biak dân hi tidanglam rawh se. Tûnlaia ring lo te kan biak dân hi a dik rêng em? Ring lo te hmusit deuh titih, diriam deuh deuha ṭawngkhum leh chhuahchhàl fo hi a rau em? Hringnun-zawhna-ril (doubt) nei ṭhin te kan biak dan hi a fuh reng em? Tam tak chuan kan hmusit a, Kristiante zâwk zâwkin 'Nang i awm chuan Pathian a awm lutuk ang' tiin diriam deuhin kan chhang fo a. 

Zawhna an nei ve a, thuhriltu te, mi pangngai tak tak an lo râwn cheu a, tam tak chuan indiriam. Inpeihna-in a tlin lo fo; a tawpah 'Hnialhrat' inti leh a. Ṭha tak hian an kawm theih a sin. Kristian kan nih chuan a dawhtu zâwkah kan ṭang tûr a ni; kan kawm hram hram ang a. Hmangaih tak leh lainat takin kan kawm tûr a ni. Pathian a awm leh awm loh tihchian tuma finfiahna lo hrilh pek vak vak hi a sâwt lem lo, a chhan chu Pathian awm leh awm loh hi chu 'Rinna' a ni tawh. 'A awm ngei e!' kha tiin finfiahna kan pe thei lo. Pawimawh ber chu 'Nunin i lantir zâwk ang u'. 'Pathian awmzia' vêl lo hrilh hrep ai chuan kan nun hian i tilang zawk ang u. Nunin a ni, nunin! Kan nun hi a dik phawt chuan keimahni-ah hian beisei an nei mai ang. 

Zawhna rawn zawttu kan hnial let hrep zêla, a fuh lo. Facebook-ah leh Whatsapp-ah te Ring lo te chu kan sawisel chiam chiam a, an mimal nun thlengin kan sawisel sak a. An chhungkua thlengin. A pawi lutuk, Kristian tih atan a mawi em? Kan chenpui/ kan unaute kan diriam vak vak hi a mâwi em? Social media-ah hian mâwl deuh deuhin khawsa tawh lo ang u. Chuvângin, Zoram! Inenfiah rawh. Kristian kan nih chuan zaidam takin, zawldawh takin i awm ang u. Kan chênpui te tân malsâwmna ni ila. Kan ṭawngkam chhuak reng reng hi mi te tâna dawnsawn nuam ni rawh se. Kan nunin Krista hnungzuitu kan nihzia i tilang fo ang u. Zaidam takin aw!

Post a Comment

0 Comments