ZMC Nurse lak chungchangah sawrkar leh MSU inrem

Aizawl | October 12, 2021: Mizo Students’ Union (MSU), General Headquarters, Aizawl chuan October ni 4, 2021-a Staff Nurse lak chungchanga thil fel lo awm avangin nimin khan ZMC Administrative staff leh Joining Report pe turte a dang a. Sawrkarin chak zawka thil tisualtu zawn chhuah intiamna a neih leh volunteer-te tan duhsakna ṭha zawk a pek turte ngun taka ngaihtuah a nih hnuah nimin tlai dar 3 khan pung khawm an ṭin a ni.

MSU chuan tun hnuah hetiang thil a thlen tawh loh nan sawrkar nen inremna hetiang hian a siam–

1. Interview-a tel lo tling anga tarlan lo awm avangin Interview Board zingah emaw hetiang titu hi chhui chhuaha dan anga hrem ngei tur a ni.

2. Voluntary Nurse-te vau ṭhintu hi darkar 24 chhungin dan angin thunun a, a ṭul anga hrem ni rawh se.

3. Nurse lak thar zingah Joining Report pe tura kohte hian ni 20 chhunga lehkha pawimawh theh luh ngai an pe thei lo a nih chuan an aiah Panel list-a mi lak tur a ni ang.

4. ZMC-a thawk tur Nurse 34 lak turah ZMC-a Covid Voluntary Nurse-te senior dan indawta a rem chin chinah duhsak dan zawn ni se, seniority hi Central sawrkar sawi angin ni 100 aia rei service tawhte chauh an ni tur a ni.

5. Health & Family Welfare Department hnuaia staff nurse 50 lak turah Mizoram hmun hrang hranga Covid Voluntary Nurse dik takte duhsak an nih theih nan hmalak a ni ang.

MSU-in Covid-19 hri leng kara thil dik lo a dona kawnga zirlaite ṭawiawmtu zawng zawngte chungah lawmthu a sawi a. Ram leh zirlaite tana MSU hmalakna thlawp zel turin a sawm nghal a ni.