Thisen pek ka tum ve a!

- Robert Chd-a

(Keimah anga nun beidawng ve tawh ten beiseina thar an neih ve theih nan admin te khan min lo approve sak hram se ka ti hle mai.)

2012 Kum khan kan veng Electric Veng KTP bul tumin thisen pek runpui kan neih tumin midangte nun chhan nan thisen pek ve ngei kha ka tum ruh ve khawp mai a, kanu pawn min phurpui ve khawp mai.

 A hun a rawn thleng a pe tur chuan ka va in ziak lut ve ta a, a tir ber ah ka BP an check... a tha thlap a, a dawt leh ah zawhna lo zawttu an lo thu a, thutna ah chuan ka va thu ve ta a, ka hming te, enge ka tih thin te min zawt a, min zawt thui zel a ka tunhma nun min zawt kai ta zel a, Pathian in min theihnghilh sak vek tawh thleng in min zawt chhuak ta vek mai a hrehawm ka va ti tehreng em.

Ka thisen zunzam a drugs chi hrang hrang ka lo chiu luh ve thin avang chuan hrisel tha viau mah ila midangte nun chhan nan thisen ka pek theih loh tur thu min hrilh ta ...... kha thu ka hriat chiah khan ka rilru a va na tak em, khatiang case avanga pe theilo nih kha ka zak ngawih ngawih bawk.

Zawhna min zawttu pawh khan ka rilru a na hle ani tih a hai bik lo, a thiam ang tawk in min hnem a, BP sang vang a pe thei lo ka lo tihsak ang che min tia, hnuk ulh teuh in a ngai hleinem thudik tak sawi tur alawm, ka tuh rah chu ka seng ve tur alawm tiin ka chhang thei hram a.... 

Pe thei lo a ka chhuak chu member pui dang an lo awm thup, pe ve lo a ka chhuak kha hrehawm ka va ti tak, ka zak bawk si engtin nge ka awm pawh ka hre tawh lo, in lam ka pan ding nghal ni ber in ka in hria. 

Kan in step ka chhuk thla midangte nun chhan nan thisen pe tura chhuak, pe ve theilo a inchhung luh kha ka hreh em em a, kan gate ka thlen dawn chiah hian Pathian hnen ah tap zawih zawih in ka inhlan ta a "Lalpa keichu ka thil lo tihsual tawh thin avangin midangte nun chhan nan thisen ka pe ve thei ta lo pawi ka ti khawp mai, ka thisen hi pe ve thei lo mah ila ka nun pumpui hi midang ten nun an neih theih nan I hman atan ka rawn hlan e" tiin kan tawngtai chiah mai chu Thlarau Thianghlim awmpuina mak danglam thlamuanthlak em em mai nidanga ka la tawn ngai loh kan dawng ta a, han sawifiah ngaihna vak pawh ka hre lo ka chhungril kha lawmna leh thlamuanna in a khat vek ni vek niber in ka hria... Thisen pek theih loh avanga ka mittui tla kha lawmna mittui in min rawn thlak sak ta daih anih chu.... Lalpa chu fakin awm rawh se... Khami ni atang khan ka phak ang tawk in fulltime in rawng ka bawl chho ve tan ta ani. Hei tunah chuan nupui fanau te neiin Pokhara Nepal ah missionary in kan chhungin kan awm mek ani. 

Rom 8:28 Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria; 

Thil tha lo tam tak lo ti thin tawh mah ila nun simin Pathian hmangaih let ve ka thlang a, chu Pathian hmangaih ka thlan tlat avang chuan chu ka nunhlui chhe ve tak chu Pathian in ka thatna turin min her rem sak ta daih anih chu.... Lalpa chu fakin awm rawh se

Drugs ka lo tih thinna rah ka seng chu dam chhunga full time a Pathian rawng ka bawl theihna kawng a lo ni ta daih anih chu. Keimah anga nun lo beidawng tawh te in awm maithei mahse beidawng lo in engkim ti thei Pa Pathian hi pan ila anin kan nun hi alo siamtha thiam in kan thatna tur hian thil engkim mai a her rem zel mai a lo ni.  Lalpa chu fakin awm rawh se.