Burma Raltlan zinga High School leh Higher Secondary School zirlaite Mizorama zirna chhunzawm phalsak

Aizawl | October 29, 2021: Mizoram Board of School Education chuan a hnuai ami ang hian raltlan zinga High School leh Higher Secondary School zirlaite tan Mizorama zirna chhunzawm phalsak a nih thu leh hmalak dan tur hriattirna a chhuah:

Myanmar ram buaina avanga Mizorama raltlan zingah High School leh Higher Secondary School-ah zirlai eng emaw zat an awm a. Mizoram sorkar remruatna angin heng zirlai raltlante hi Mizoramah zirna chhunzawm phalsak an ni a.

MBSE dan dinglai angin zirlal zawng zawngin Registration tih vek tur a ni a. Raltlan zirlai nei school-te chu a rang lama hma la tura hriattir an ni. Tuna an raltlanna khua/venga Local Council/Village Council/YMA/YLA/MTP Chairman emaw President emaw hnen atangin raltlan an ni ngei tih hriatpuina lehkha thil telin Registration form-te hi MBSE Office, Aizawl-ah emaw MBSE Regional Office, Lunglei-ah emaw Head of Institution kaltlangin thehluh tur a ni. An zirna tilang thei document awm ang angte thil tel vek tur a ni a. Chutiang nei lote dilna chu a bika ngaihtuah a ni ang.

Registration dilna form hi November ni 10, 2021 thleng thehluh theih a ni ang. Hemi hnuah chuan eng dilna mah pawm a ni tawh lo ang.

Registration fee: Rs. 200/- (Higher Secondary tan)

Rs. 100/- (High School tan)

Registration dilna form hi MBSE official website www.mbse.edu.in -ah download theih a ni.