Kan policy tihpuitlin a nih theih nan MNF kawr ha chung te Congress kawr ha chungte pawhin min pui thei – ZPM Leader Lalduhoma, MLA

ZPM hi ka phak tawkin ka zir ve thin a, mipui sawrkar, huapzo ni ngei tura ka beisei vanga ZPM a tel ve hi ka ni - AMC Councillor Baryl Vanneihsangi

Aizawl | October 22, 2021: Nimin khan Pu Lalduhoma, Leader ZPM chuan Kolasib-ah ZPM zawm thar mi 271 a lawm lut.

ZPM zawm thar te hi MNF aṭangin mi 39, Congress aṭangin 214, BJP aṭangin 3, Neutral aṭangin 15 an ni.Kolasib Block Congress Committee (KBCC) Adviser ni lai mek leh Congress Block President lo ni tawh leh VCP term hnih lai lo chelh tawh Pu K Zothansanga leh Pu K Lalmalsawma tuna INC VC treasurer ni lai mek leh KBCC Jt. Secretary ni lai mek te, Lalhmunmawia INC Unit-II Treasurer leh VEC-Vice Chairman lo ni tawh te leh Pu Zarzoliana  INC Unit-I President ni mek lai te pawh an tel ni.

He huna thusawitu Pu Lalduhoma chuan, “ZPM chuan Party a rinawm turin kan inzirtir ngai lova, policy a rinawm turin kan in zirtir a ni. Kan policy anga kan awm lo a nih chuan min zui reng hi in ba lo,” a ti a. “Mizoram hian state kum 35 kan hmang ta a. He mi chhung hian MNF leh Congress chuan ro an rel char char a, ram vei tak tak se, kum 35 chhung hian mipui dinhmun chu nasa taka chawisanin a awm tawh ngei ang. Mahse, ram hmangaihna tak tak thinlung pu pha lova ram an kaihhruai avangin hmasawn thei lovin tun dinhmun hi kan thleng ta a ni. Bumna thâ nena vote zawng ṭhin te hi i inbum nawn tir tawh lo ang u. Vawi khat bum i nih chuan i thiam loh a ni lo a, bumna ngai a bum nawn i nih erawh chuan i thiam loh a ni tawh. Kan ram siam ṭha tur hian ZPM hi kan sawrkar a ngai a. Kan ṭha bik, kan fel bik, kan inti lo, mahse kan kalphung hlui thlakna tura system thar kan duan te hi mipui hmaa kan ram dam nan kan rawn zuar a ni. Kan ram dinchhuahna tur policy hi a puitlin theih nan tuna lawmluh zawng zawng te bakah mi zawng zawng ka sawm duh che u a. Kan policy tihpuitlin a nih theih nan MNF kawr ha chung te Congress kawr ha chungte pawhin min pui thei a ni,” a ti.

Pu Duha chuan, “MNF party-in ka MLA nihna min ban khan ka politics zin kawng a tawp dawn ta a nih hi, ka tlin nawn loh chuan politics a ka kal zel chung lamin rem a ti tawh lo a nih dawn hi ka ti a, chu chu kan chhungkaw ngaihdan pawh a ni. Mahse mipui zawkin kal zel turin min la duh a ni ang, Pathianin mipui te thinlungah hna thawkin thlan tlin ka lo ni leh ta a, ka la kal ve thei ta zel a nih hi,” a ti bawk.

AMC Councillor Baryl Vanneihsangi pawhin thu sawiin, “ZPM hi ka phak tawkin ka zir ve thin a, mipui sawrkar, huapzo ni ngei tura ka beisei vanga ZPM a tel ve hi ka ni. Kan hrawn tawh leh hrawn mek party te hi chuan an huam zim thei hle a, mipui nawlpuiin kan chan tur kan chang em? Dik taka thil tih hi kan sawrkar hrawn mekah hian a awm em? Thalaite hian uluk takin i ngaihtuah ang u,” a ti.

Lawmluh inkhawm hi ZPM Kolasib Block President Pu R Lalruaia-in kaihruaiin, Upa R Lalhluna, IPS (Rtd) in hunserh a hmang a, Pu B Lalchhanzova, GS, Gen. Hqrs, i/c Orgn (Kolasib District) chuan report a pe a, Pu Lalthansanga (Chatea) ZPM Vice President bakah Christina Roluahpuii Sailo AMC Councillor leh General Headquarters hruaitu leh Kolasib Block hruaituten an hmanpui bawk a ni.