JUSTICE FOR

- David Sailo

Ziak ve tura min rawn ngen ngam an awm tak thluah ah chuan ka lo thlir a, ka lo chhiar a, tu emaw kut deuhah hian ka dah mai a, mahse mi ngaihdan ni lo, ka ngaihdan ziak ṭhin ka ni a, keuhthlukna lam ah in hriatthiamna ka ngen e.

SAP RAMAH -

R&B Star, R.Kelly chu puhchhiatna chi hrang hrang tawkin a Case chu kum 20 vel hnu ah chinfel a ni a, kum 100 tang turin an hrem!! An larna, an hausakna, an thil tih theihna chuan Dan hmaah Witness khati zozai leh finfiahna ṭhatawk hmachhawn turin a tling zo lova, a in dawt te te (Systematic) takin Court in a relna, thutlukna a siam ta a ni.

R.Kelly hian Media leh Interview hrang hrangah a thiam zia a sawi nasa hle a, a changin a dik zia lan nan a awm a chum ṭhuai ṭhuai a, a changin hnuk ulh ṭeuhin khawngaih thla a la thiam bawk a, mipui lam chuan a tuar nasa pawla an sawi, a hun laia kum 17 mi lek midum tleirawl, Azriel Clary chu "Justice for" an tih sak hut hut lem lo thung a. Rorelna ah erawh a thiam lo zawk chuan a tuar dawn tho tho a ni.

MIZORAM AH -

In puhna a la ni vek a, awm chum vak vak te, in sawi khawngaihthlak te, mipui Attention lak te, mittui tih tlak te hi Court hmaah chuan engmah a ni lo. Social Media a Pasal te emaw, chhungte thiamthu emaw, kan ṭan zawngte thlavang hauh pung pung pawh hi Court hmaa sawi thei kan nih lem loh chuan awmze awm lo mai a ni. Police hmaa inpuanna tak ngial pawh hi Court ah thutling a ni si lo.

Tun hnaiah tute chhungkaw Case emaw a lar hle mai a, a hmuna chiang taka hmutu, a chin chhuak hria ang hrim a tute emaw diriamna, hremhmun em pawh chang tlak lo khawpa deusawh duh kan tam hle mai. Eye Witness erawh pathum chiah an awmin sawi a ni bawk si. Thu hretu a pui kan ṭhahnem ngei mai. 

Mizo leh Mizo, Society tlem te kan in beih phah a, kan milar te thlengin an ngaihdan avangin kan chelsawlh a, kan umzui hreh lo zel a. Tu emaw ṭawngkam takin mipui Court a rel fel tur chu nise pawhsawm vek tlak pawh kan awm der tawh ang.

TUAR RAWH SE -

In puhna a awm a, INPUHNA a la ni reng. Court in dik a ti a nih chuan thil tenawm tak, huat thlala tak, Mizo mipui thinrimna leh diriam tur tak thil pawh a ni a, a hremna pawh a nep hauh lovang. Khatiang thil, kan sawi ringawt pawha vûng chur tawh hi a tak ram a nih ngai chuan a aia uara la dem hial tlak pawh a ni ngei ang. 

Kawng kan zawh a, kan ṭan zawng kan ti lang a, a thiam lo zawka ngaihte chuan Rorelna dik hmuin tuar se kan duh thu Social Media thlengin kan tarlang a, kan lo kawlh ve âr hlawm a!! Hei chin pawh hi a la dik. Rorelna dik hmuh kan duh a ni. Rorelna dik tak chu thleng mawlh teh se.

Chutih laiin an thil tih emaw, an thil tiha puhna hun liam tawh, Court thu kal mek, hremna an tawh dawn leh dawn loh pawh la hriat loh, kan rin loh lam daih dik zawka la keuhthluk theih fo thil ah a Victim tak tak nilo, an chhungkua leh vuavang thlenga thutlukna dik tak awm tawh ang hrima kan in diriam lutuk hi chu a dik ber angem? A tuartu dik tak te chuan zalenna, Rorelna dik hmu se kan tih lai hian a ti ve tu ni hlek lo, kan mi lar leh anmahni ṭan awm anga ngaihte thlenga kan vaihma phiar phiar a, ṭawngkam kan duh tui lo barh barh lutuk ṭhin hi chu kan ti dik vek bik lo maithei.

DAN CHUAN A KAWNG ZAWH SE -

Sap ṭawng kan hawh ve ngial ange, "Let the law take its Course" an lo ti a, Rorelna dik awm tura ke kan penna hian Dan chu kan dip dalin kan hnuai chhiah zawk a ang lek lek a, haw haw a ngam theih, haw haw bawka thiam chan tumna rawng a kai lek lek thin. Rorelna dik pe tura kan hmalakna hi chu a fakawm a, Rorelna pe theitute kuta dah dan thiam a ngai a, Mizo Kristian takin a titu ni ve lo, an chhungte thlenga cheksawlh hi kan Kristian inzirtirna nen a in rem mang lova, a Taliban ruih zawk a ni. A tuartu tur chuan tuar mai sela, a dik lohna finfiah a nih hnu ah diriam thiam mi kan nih chuan diriam mai ila, a titu, a tel ve, a hma la tu pawh nilo, kan inkhawm pui, Kohhrana kan lawi pui, YMA a kan in hman pui an chhungte leh zel chunga kan duh chhe lutuk hi chu Chunglam zia lo ve deuh e ka ti a ni.

Keini phul leh phur hluai ai hian DAN hian a ngaihtuah ngun dawn a, phuahchawp emaw tenawm taka khawsakna emaw, mipui fuihpawrhna emaw pawh nise a hai lang dawn a, awmze neiin a in dawtin a thlir thlap thlap dawn a, tah chuan thu DIK zawk pawh nilo, a DIK ber a rawn lang dawn a, chu chu kan DEM tur chu a ni dawn lawm ni?!! Mipuiin Rorelna dik kan duh zia kan tarlang bawk a, a lo lang em em ang.

I LO INDEM PHAH LO ANG U -

A dik a nih chuan a tuartu tan chuan a nat dan tur hi sawifiah thiam rual a ni lo. Chutih laiin rorelna chuan DIKNA zawk chu kan tum loh lam daihah a keuhthlu a nih chuan Dawtsawi hmang chu dem tur a ni ve thung ang a, mi a tih mualpho nasat avangin tuar ve leh chhawng tlak a la ni ve hial ang. Hei tak hi kan au vak vak, kan "Justice For" vel aia pawimawh chu a ni a, Dan anga Roreltute Rorelna leh thutlukna hi. Chutiang a ṭhu pha chin emaw, sawi tur neia in lan ngam sak kan nih lem loh chuan kan ṭan zawng tih lan kawngah pawh pawisawi ve lo te thlenga hmer kual a, dem tur leh diriam tur a zawnin kan zawng emaw tih tura lo tal ve chiam chiam hian kawngro a su thui lo e mai.

Lo in beih phah nan hmang lo ila, chhungkaw pahnih/thum vel buaina ah hian mihring kan nih anga ngaihdan kan neihte tarlan chin tawk hria ila, kan vei a nih chuan Rorelna dik tak a thlen theih nan ṭawngṭaipui ila, mihring hian thiam loh chantir mah ila Chunglam mitah chuan tu zawk zawk pawh "A kut chhuakin bel vawtu lung a dum" ang hian Chunglam hian a hmangaih ve ve a, kan Vanram kai pui tur pawh an ni maithei a sin. 

POLITICS NEN -

In an riauna neiin ka hre ve a, Ruling boruak, Minister nihna, Ruling Block hruaitu nihna nen haw haw in in hampuar in, hna tiam te, Development Work hrang hrang te, Free Clinic nen  Campaign chiam chiam mah ila ngawi rengin mipuiin an hmet tling keuh mai ṭhin.

Haw haw in tute emaw thubuai hi rawt thakin a tam zawk sî hluah hluah tir tum mah ila, Court chauh chuan thutlukna a siam dawn a, Dan chuan a kawng a zawh mai dawn a ni. 

TLIPNA -

Ka sawi duah a, Court thutlukna puan a nih hma chuan Court ah Witness ah ṭang ngam a,  hre ber nih kan khêl tak tak ngam lo a nih chuan mihring mihrinna a ṭan zawng kan lo neih te ṭan dan tawk hi Chunglam zirtirna mila kalpui a, Chunglam hriatpui tlaka "Justice For" hi kan zir thar a ngai in a lang a, thudik, thutlukna awm hunah vaupung tina chi, diriam lama chemkal, cheksawlh chak ngawih ngawih kan nih chuan a khawi lam lamah pawh chu kan thiamna chu lek lam thei turin in peih at mai ila!!

1st October 2021