JAMES LALRAMLIANA LEH A HRUAITU THLARAU


     James Lalramliana hi ka haw lova, ka huatna chhan tur pawh a awm lo. Ka sawichhe  lova, ka fak bawk hek lo. Amah leh a thlarau chan hi sawifiah a tula, thudik leh Pathian thlarau chawisanin awm sela, thlarau sual erawh tihmualpho in awm rawh se. Hei hi thil tha leh tha lo kan hriatfiah ka duhna avanga ziak mai ka ni.

      James-a hian a thlarau kalpuinaah hian a hriatthiam mai theih loh a kalpui a, amah mai a inhrethiam thei a ni lo bawk. Hrethiam emaw, hmufiah emaw a intihlai hian a hre hauh lova, a khawngaih thlak hle a ni. A taka a hrethiam lo hi demna tur a awm lo bawk. Buma a awmna hi a ril em em a ni. Amah duh leh duh lotute pawh hian tuman an hrethiam a ni chuang lo. An duh a, an duh lo satlaih mai a ni.

     Hetah tak hian thlarau chenchilh ram in ti si a, thlarauva kan fiah loh zia a lang chiang a. Thlarau mi emaw, kan pastor rual emaw, rawngbawltu tu emaw te hi thlarau mitvarna laka kan mitdel zia a langchiang hle a ni. Kan mamawh em em thin chu thlarau tha lo paihthla a, a dik tungding ngam hi a ni fo. Chu mi atan chuan hmuhfiahna hi a pawimawh thin reng a ni.

      James-a a rilru pianchhuah phung atang rengin mi sehhel, mi ngeng tak,  rilru kalkhat zet mai, vei tawh lam veina tak, duh tawh pawh duh tut tut, hmabaka tih tur awm nghak thei lo mi, mi inngaitlawm tak, tha hriat lama tha tawp, tha lo a hriat lam insum thei tak, ni chu ni, ni lo chu ni lo tih ze nei a ni a. A tunhma nunah a hrechiangtu in ti ten demna tur an hriat vak ka ring lo.

    Amah hi thinlung ngaihtuahna lama kalna mi, mahni a ngaihtuahna ril tak taka inkawm thin, mite zaizui ve mai lova ngaihdan hram rama cheng fo, tumah ngaihsan bik nei lem lo, a duh leh a tum chu ni a, ti thei ve a inngairu tlat a ni fo. Amah a khawvel leh hringnun hran neih deuh ang chi hi a ni. Mihring thilah misual a ni lo bawk.

     A nihphung dik tak chu chhia leh tha hriatna kaihhruaina aia thinlung ngaihtuahna in a hruai leh a thunun a ni ber a ni. Khitiang ang mi nih khi a hahthlak em em. Suangtuahna ram tha lam beiseina hian nun a delhrit thin hle a ni. Mihring nihphungah thinlung lam hman chak zawkna hi a him lova, chhia leh tha hriatna hi a chungnung zawk ngei tur a ni. Rilru lamah chuan a letlingin a piang tihna a nih chu. Hei hi a a tihna a ni lo.

     A pianna dan reng atangin mihring nihna rilru dik zawkah lo piang lovin, a hmanrua tur zawk thinlung rilru lamah a rawn piang a ni. Hei hi hrethiamtu in kaihhruai diksak a nih loh chuan amahin a rawn inmanin a rawn inhrethiam ngawt thei tawh miah lo a ni. Mihrinna dika kawngbosa in a lo piang tihna a nih chu. A nihna takah chuan a hriat miah loh hian mihring a lo la ni phak ngai reng reng lova, a mihrin lohna zawk a rawn mihrinpui char char tihna a ni. Hetiang hi mi tam tak kan awm a, kalna mi leh mi lo kan awm mai zawk a ni. Eng ang pawhin awm se kei chuan a mihrinna dan zawk atangin ka dem hauh lo.

     A pawi ta em em thin zawka chu, hetiang mite hi Pathian an duh lutukna zawn atang hian Setana'n an chan loh khan lamah a lo bum ta hlauh thin lai tak hi a ni. Anmahni lamah chuan Pathian ang chiahin hna a rawn thawk tawh thin si a. Chu chu Pathian tak emaw tiin an kalpui ta tlat thin a ni. He bumtu bumna game hi chu sang tak a ni a, thliar thiam mai mai chi a ni tawh lo.

     James-a pawh hian Pathian thlarau dik tak hi a duh ber chu a ni a. Mahse, thinlung rilru hmang mi a lo nih si avangin, chu thinlung a tak chu Setana'n thiam em emin bumna hmanruaah a lo hmang ta si a. Ni emaw a tih kha a lo ni dik ta si lo a ni.

    A pawi lai ber chu Jamesa'n thlarau dik lo lam a duh ni lova, ama mihring nihna dana a rilru pianchhuahpui thinlung ngaihtuahna lam hmang nasa mi a nihna lai kha a pawia chu a ni zawk. Chuvangin, James-a kaihruai dik tur chuan thlarau lam thil ni lovin a rilru puthmang atanga a mihrinna tih diksak a pawimawh zawk dawn tihna a ni chu.

      Mihringte hian kan thinlung hi chu kan chhia leh tha hriatna hmanga kan enkawla, kan kaihhruai dik tur a ni mai a. Kan thinlung vengtu tur chu kan chhia leh tha hriatna hi a ni a, chu chuan rim takin a veng tha tur a ni. He mi kawngah hian James-a hi hrilhfiahtu kan la awm a rinawm loh. Chuvangin, a dinhmun tichhe thui khawpa a lo awm hman a nih phei chuan thil pawi tak a ni ang a, tawngtaipui a tul hle dawn a ni.

     Hun hnuhnungah hian James-a anga Pathian emaw an tih reng si a Setana'n a lo hman ni reng si hi an pung tual tual dawn. Thilmak tih theihna te, tihdam theihna te pawh an nei ang. Tin, Bible an hum ang a, Pathian hmingchhal in thu an sawi ang. Mahse, chung chu Setana a ni dawn si a ni. Mi in Bible huma Pathian thu a sawi avang ngawtin Pathian thu a ni dawn lo tihna a nih chu. Amah kha eng ang mihrinna kaihhruai nge? Tih hi finfiahna pawimawh ber a ni tawh dawn a ni.

     A tawp berah chuan James-a hian mihring rilru hman tur dik tak a rawn hmana, a thinlung lam bumtu nawrna ni lova, thlarau dik tak changa, a duhna ropui tak hmanrua a hmanga Pathian malsawmna leh rawngbawlna ropui tak a rawn chan leh hi ka beisei a, ka duhsak tak meuh a ni e.

Post a Comment

0 Comments