Health minister-in Civil Hospital Aizawl-ah ICU thar hawng

Aizawl | October 2, 2021: Health Minister Dr. R. Lalthangliana chuan vawiin khan Civil Hospital, Aizawl-ah Medical Intensive Care Unit (ICU) ward thar, khum 10 awmna a hawng.

Civil Hospital Conference Hall a ICU thar hawn puala inkhawm buatsaihah Khuallian Dr. R. Lalthangliana chuan vawiin hi Mizoram tan ni chhinchhiah tlak, mellung thar kan phunna ni a ni a, Civil Hospital, Aizawl chu Mizoram hmun hrang hrang atanga damna duh damlo ten an pankhawm thin a nih avangin damlo na zualte enkawlna tur ICU khum 10 zet kan neih belh ta hi a lawmawm takzet a, damlote tan malsawmna a nih bakah sum tam tak damlo ten an sen thin pawh nasa takin a chhawk zangkhai thei dawn a ni,  a ti a. Medical ICU ward dang khum 10 awmna pawh Civil Hospital,  Aizawlah hian reilote ah peihfel a ni leh dawn a ni, a ti bawk.

Minister chuan ICU din a hautak thu sawiin, senso a turu em em mai a, ken tel a ngahin thawktu tur pawh a duh tam a, heng zawng zawngah hian hriatthiamna neia nasa taka thahnem min ngaihpuitu Chief Minister, Finance Minister ni bawk Pu Zoramthanga chunga lawmthu thinlung takin Health department aiawhin ka sawi a ni, a ti a. ICU a thawktu tur specialist daktawr kan mamawh ang lak tur an vang thin hian rilru a kalthui tir thin tih sawiin, Mizo thalai lehkhathiam tak tak ten hei hi chona ah ngai se a duh thu a sawi a, Mizoram tan thiamna zir kawnga ke pen nasa lehzuala, kan mamawhna ang thiamna kil tin dapchhuakin, medical lamah pawh super specialist daktawr nih ngei tum turin heti lama rilru pete a ngen a ni.

Health Minister chuan Civil Hospital, Aizawlah hian hun rei tak khum 5 awmin kan kal reng a, tunah hian 15 ah tihpun a ni ta a, reiloteah Medical ICU khum 10 dang kan peihfel bakah Pediatric ICU khum 4 leh Obstetric ICU khum 4 awmna peihfel a ni dawn bawk a, heng zawng zawng peihfel a nih hunah chuan ICU khum 33 a awm tawh dawn a ni, a ti a.  Dedicated COVID Hospital- Zoram Medical College-a ICU khum 34 awm mek bakah khum 20 dang dah belh tura hmalakna pawh tluang taka kalpui a nih thu sawiin, ICU ward thara thawk tur nurse 50 sawrkarin a la mek a, ICU ward thara thawk tur staff dang lak tawh sate pawh training pek vek tawh niin, ventilator rawn vuah tur Company technician te pawh niminah rawn thlengin hna an thawk nghal char char a, kar leh lamah hi chuan khum engemawzat hi chu kan hman tan theih kan inbeisei a ni, a ti.

Civil Hospital, Aizawlah Magnetic Resonance Imaging (MRI)  bun tura hma lak mek a nih thu tarlangin Dr. R. Lalthangliana chuan COVID-19 hripui leng vangin sum harsatna India ram pumah kan tawk a, heti chung hian theihtawp kan chhuah a, Trauma Centre sak tur hun rei tak tihkhawtlai tak pawh a rang thei ang bera kutthlak turin tan kan la mek a ni, a ti a. Civil Hospital ram chhunga medical quarters sak tura ruahmanna siam pawh a theih ang anga bawhzui mek a nih thu sawiin, Nephrology Department din tura hmalakna pawh thui tak kalpui a nih thu a sawi a, Boeing Company atangin sum hmun beisei a nih thu tarlangin ZMC tan pawh Boeing Company atang tho hian beisei a ni, a ti.

Khualzahawm Dr. ZR. Thiamsanga, Vice-Chairman, Health & Family Welfare Board  pawhin Chief Minister leh Health Minister te thahnemngaihna leh Health department a thawktute tanrualna avanga ICU kan neih belh hi Zoram tan chanchin lawmawm a ni, a ti a. ICU chu mirethei leh harsate tan a hlu lehzual dawn a, sum tam tak senga private damdawi in ICU leh phai lama in refer a ngai thin pawh nasa takin a chhawk zangkhai dawn a ni tih sawiin, damlote tan damna leh malsdawmna thlentu a ni dawn a ni, a ti.

Civil Hospital, Aizawlah hian kum 2007 khan Medical ICU khum 3 dahin bul tan a ni a, kum 2012 ah khum 2 dah belhin khum 5 ah tihpun a ni a, tunah hian khum 10 dah belhin khum 15 a awm a, ward dang khum 10 awmna peihfel a nih hunah chuan Medical ICU khum 25 a awm tawh dawn a ni.

ICU hawn tak hi khawl tha leh tunlai ber bera thuam a ni a, ICU a thawk tur daktawr 5, nurse 25 leh IV-Grade 10 pawh lak fel vek tawh a ni.

Vawiin ICU hawnna ah hian Civil Hospital, aizawl-a daktawr thawk pension tawhte, Aizawl City Local council Association hotute, Dawrpui Local Council Chairman, Non-Government Hospital Association of Mizoram aiawhte leh sawm bik mi pawimawhte an tel a ni.

Vawiina ICU hawnna in khawm hi Health Secretary Pu R. Lalramnghaka'n a kaihruai a, Dr. T. Lalhmangaihi, Director, DH&ME hnen atangin report ngaihthlak a nih h bakah, Health department Principal Director Dr. F. Lallianhlira'n thuchah tawi a sawi a, Dr. Lalhmuchhuaka, Medical Superintendent, Civil Hospital, Aizawl-in lawmthu sawina in hnu a khar a ni.