SUCCESS STORY | UPSC 2020 pahnihna Jagrati Awasthi

~ Eleazer Tetea Hmar

Union Public Service Commission (UPSC) result kan hria a, Mizoram atanga tling kan la awm loh avangin thalaite leh sorkar demna  bakah education system mawhpuhna a tam viau mai a. Heng zingah hian eng nge kan tlakchham ber chu nita ang hriatthiam a har viau mai.

Demna leh duhkhawp lohna chu dahtha ta ila UPSC in 2020 result a tihchhuah takah khan mipa 545 leh hmeichhia 216, an vaiin 761 ten hlawhtlinna an chang a, ST category atangin 61 tling an awm a, an zinga 35 hi MEENA hnam an ni. Chuta pakhatna dinhmun hauhtu chu Shubham Kumar niin, hmeichhe lamah chuan Jagriti Awasthi chu pakhatna a ni thung. Jagrati hi Engineer background nei a ni nain optional ah Sociology a la thung a ni. 

Jagriti hlawhtlinna kawngah hian a thawhrimna leh huaisenna mai bakah a chhungte an pawimawh hle a. A hnathawh lai a kalsan hnu, UPSC exam hmachhawn tura a inbuatsaih atanga kum 4 chhung tehmeuh chu a chhungte hian TV en mumal lovin an insum thei a ni.

He hmeichhe tumruh tak mai Jagriti Awasthi, kum 24 chauha upa hi Bhopal, Madhya Pradesh a piang leh seilian a ni a. A pa chu SC Awasthi niin Homeopathy lama mithiam a ni. A nu erawh  school zirtirtu niin a fanu thiltum avang hian zirtirtu hna chu a kalsan a ni.

✓ ZIRNA LAMAH

Zirna lamah chuan kum 2016 khan Maulana Azad National Institute of Technology, Bhopal atangin B.Tech (Electrical Engineering) a zir chhuak a. Hemi kum vek hian GATE exam paltlangin Bharat Heavy Electricals Ltd (BHEL) ah a thawk chhunzawm a. Mahse, a tum ber erawh UPSC exam paltlang a nih miau avangin BHEL a cham hlen a tum lo. Kum 1 lek a thawh hnuah UPSC inbuatsaih tan in, a vawikhat nan 2019 khan exam a hmachhawn ve a, prelims pawh a paltlang zo lo. Inbuatsaihna hun tam zawk a mamawh tih hriain, rim taka a lo sual chhuah a hna chu a bansan ta a ni. Tichuan, 2020 exam hmachhawn lehin tun dinhmun hi a thleng ta a ni. Ama sawi dan takin 'COVID-19 HRILENG HIAN INBUATSAIHNA HUN TAM ZAWK MIN SIAM SAK A NI'. tiin a sawi.

✓ JAGRATI HLAWHTLINNA KAWNGA THIL PAWIMAWH.

Hna tha tak kalsan in hlawhtlinna a chang kher angem tih pawh chiang lovin UPSC exam hmachhawn turin a inbuatsaih ngamna te hi a fakawm a. Chutiang bawkin a thawhrimna te hi a fakawm a, hlawhtlinna chang thei turin a taima bawk. Heng zawng zawnga phena kan sawi hmaih miahlo tur chu a chhungte thlawpna mawlh mai hi a ni. A nu'n mahni hna kalsan khawpin a thlawp a, a unau ten kum 4 chhungin TV an en ngai meuhlo. Hetiang khawpa chhungkaw tangrual an nihna hi an fakawm takzet a ni.