SUCCESS STORY | CHHUNGTE HRIAT LOVA IPS INZIAK TLING THEI NULA!

Bus conductor fanu, Coaching class kal lo, vawikhat UPSC exam a IPS inziak tling thei nula Shalini Agnihotri hi Kum 1989 January Ni 14 khan Himachal Pradesh Una District thingtlang khaw pilril ve tak Thathal khuaah a lo piang a. A pa chu Bus conductor niin a nu chuan a theih ang angin puan te thuiin an unau thum  zirna an hlawtlin theih nan an thawk rim a. A u, a laizawn nu chu Dental Surgeon niin a nau chu Army officer Lieutenant  a ni.




Shalini zirna lamtluang:
Hmeichhe naupang zakzum ve tak, school kal ve lai pawha tlar hnung chuh ve thin Shalini chuan an khuaah zirna bul a tan ve a. Pawl sawmah 92.2%  hmuin  tha takin a pass a. Pawl sawm pahnihah mark 77.4% a hmu thung. Himachal Pradesh  Agriculture  University, Palrampore atangin a graduate a. College a kal lai atangin UPSC  Exam turin a theih ang tawkin a lo inbuatsaih ve thin. “College ka kal lai hian activities hrang hrang Sports leh Literatute lamah te nasa taka ka lo inhmang khan  Inrintawkna min pe a ni” a ti.

UPSC lamtluang
Scholarship a dawn te renchem taka hmangin a chhungte leh a thian tha te pawh hrilh lovin UPSC Exam turin a inbuatsaih a. Coaching class a beisei phalo, Internet hmangin nasa takin UPSC exam atana material tangkai tur a dap khawm a, a inzir a. An college Library-te hmangin a theih ang tawkin a inbuatsaih a. “UPSC ka exam dawn hian ka nervous nasa hle a, a dawn hnaihah phei chuan ka muhil thei lo” tiin a sawi.  An result a lo chhuahin IPS a tlin thu a chhungte a hrilh ve chauh. Anu leh Pa phei chuan eng anga hna sang leh ropui nge  a nih an hrethiam mai lo.


A hlawhtlinna thuruk
Naupang te a nih laiin a nu nen Bus in an zin a, an thutna bula ding pa pakhat chuan a nu thutna nghenchhanah chuan thut harsa khawpin a kut dahin a rawn tibuai reng a. Hmeichhe naupang Shalini chuan vawi tam tak a kut dah sawn tura a hrilh hnuah chupa chuan  “DC i nih hunah chauh i thu ka awih ang” tiin thamlo takin a chhang a. Shalini chuan DC chu enge a nih a hre lo. Mahse a len hunah erawh sawrkar hna lian leh ropui tak nih ngei erawh a tum thung. Shalini interview naah a sawi fo thin chu, “Ka nu leh Pa te’n kan unau zirna atana an thawhrimzia ka theihnghilh thei lo, kan in kan sa zo thei lo a, mi tam tak deusawhna pawh ka nu leh pa ten an dawng fo thin. Chung zawng zawng hre reng chung chuan hlawhtling ngei turin lehkha ka zir thin a ni,” a ti.


Thawhrimna leh Tumruhna piahah malsawmna
Zirlai kan nih laia kan nih tum min zawha kan chhanna tlanglawn thin chu IAS, Pilot, Doctor, Engineer etc a ni. Chung kan nih tum tipuitling tur erawh chuan Thawhrimna leh Tumruhna a ngai thung. Academic, Sports, Music, Sumdawnna etc eng kawng pawh zawh ila, Harsatna chi hrang hrang  Hmuhsitna te, diriamna te kan tawk ang. Chung kan harsatna tawh te chu inhneh tir mai lovin Thawhrimna leh Tumruhna hmangin Malsawmnaah chantir turin tan i la zel ang u. Social Media-ah ‘Status’ inziah that siak aiin Kan ‘Identity’ tha hi a pawimawh zawk si a.



(He thu hi Caleba Zarzoliana post lakchhawn a ni a, amah be duh chuan a hmingah hian hmeh mai tur a ni.)

Post a Comment

He post chungchanga i ngaihdan lo sawi ve rawh:

Previous Post Next Post