National Award to Teachers Jacinta Vanlalengzami hlan

Aizawl | September 5, 2021: Vawiin khan A&M Grandchild School N.Vanlaiphai Headmistress Pi Jacinta Vanlalengzami chu National Award to Teachers hlan a ni a. India ram hmun hrang hranga zirtirtu tha thlan chhuah mi 44 te National Award to Teachers hlanna programme, Video Conference hmanga neihah Aizawla NIC video conference room-ah India President Shri Ram Nath Kovind aiawhin Dr.Lalzirmawia Chhangte IAS, Secretary Schoool Education Department in Pi Jacinta hi Medal leh certificate a hlan a ni.

Nikum ang bawkin kumin hian COVID-19 hri leng avangin National Award to Teachers hi N.Delhi ah pek theih a ni lova. Vawiin Zirtirtute Ni ah hian NIC Video conference room-ah National Award hlanna inkhawm hi lo zawm ve in Pu Lalhmachhuana SPD Samagra Shiksha in a kaihruai a. School Education Secretary Dr  Lalzirmawia Chhangte chuan thu sawiin khaw tinah hian zirtirtu tha tak tak an awm a, Award dawn hi an ngaihtuah loh avanga chawimawina hi dawng lo mai an nia a hriat thu a sawi a. Zirtirtute hian Award hmuhna tura tehfung chi hrang hrang hmang hian thawk se, zirna atan a tha a, award hmuh nan a tha bawk a ni a ti. Sorkar school-a zirtirtute zingah Headmaster a an kaisan dawnin duh lo an tam thin a, hei hian school tam tak chu head nei lovin a awmtir tih sawiin sorkarin kaisanna a pek anga thawh hi an mawhphurhna  pawimawh tak a ni, a ti. 

School Education Director Pu James Lalrinchhana chuan kumtin zirtirtu thate chawimawina chi thum, National Award, State Award leh District Award te hlan thin a ni tih a sawi a.  Heng chawimawina hlu tak tak te dawng tur hian zirtirtu te hian tehfung leh kalphung fel tak chi hrang hrang te an paltlang a ngai a, heng award dawngtu te hian Village Level Committee atang hian bul an tan theuh a, uluk taka endikna te paltlang an nih avang hian an chhuanawm hle a ni a ti. Mizoram atanga National Award to Meritorious and Outstanding Teacher dawn hmasak ber chu kum 1965 ah khan niin Pu Selchhunga (L), Head Teacher, Saitual Primary School in a dawng a. Vawiin a National Award dawngtu Pi Jacinta Vanlalengzami, Headmistress, A&M Grandchild School, N.Vanlaiphai, Serchhip District hi Mizoram atanga National Award dawng 76-na a ni a ti. Tunah hian National Award dawng tu - 76 zingah Pension tawh - 65, Boral tawh - 28, Thawk mek-11 an awm tih a sawi bawk.

Inkhawm kaihhruaitu Pu Lalhmachhuana chuan kum 2017 atang khan  National Award dawng tur thlan dan tih danglam a ni a, a hma lama kumtin mi 350 in an dawn thin kha mi 45 chauhin an dawng thei ta a. Mi 45 thlang chhuak tur hian India ram puma zirtirtu nuai 96.8 atangin mi 154 chiah chhawp chhuah theih an ni a, state atangin 126; UT atangin 10 leh central school atangin 18 an chhawpchhuah theih a, Mizoram chuan mi 3 kan rawt ve thei a ni a ti. Kumin hian India ram pumah mi 154  chhawp chhuah an ni a, heng zinga 44 te hian Award hi an dawng a ni a ti bawk.

National Award to Teachers hian chawimawina  thuziak leh pawisa fai cheng 50,000/- a keng a. Mizoram sorkar chuan he chawimawina dawngtute service hi kum khat  a pawhseisak thin a ni.

Vawiina Award hlanna inkhawmah hian School Education Department officer te, chawimawina dawngtu Pi Jacinta Vanlalengzami leh amah tawiawmtute, kumina State Award dawngtute an kal khawm a ni.