Sports & Youth Services minister hovin NSS Day hmang

Aizawl the 24th September, 2021: Vawiin khan National Service Scheme (NSS) din champhaphak NSS Day 2021 lawmna Aijal Club-ah neih a ni a. Sports & Youth Services Minister Pu Robert Romawia Royte chuan khuallian niin a hmanpui.


Pu Robert Romawia Royte chuan Mizoram NSS volunteer te chet thatzia sawiin state chhungah mai ni lo rampum ang pawhin hriat an hlawh, a ti a. Hripui leng karah pawh ram leh khawtlang rawngbawl hna an theih ang angin an thawk a; thisen pek leh faina kawngah phei chuan hmahruaitu an ni, a ti. Sports Minister chuan NSS te chu tlawmngaihna a taka nunchhuahpuitu an ni tih sawiin an rawngbawlsak ram leh mipui tana malsawmna an nih piah lamah volunteers te pawhin an tawnhriat atangin midangte tanpuitu nih hlutna an zirchhuak a. Kawng engkimah mipui tling ni turin a pui a, an thiltih that phenah thilthatitu NSS volunteer te pawhin zirlai tha tak tak an zirchhuak a ni, a ti.

NSS volunteer te thiltih langsar zingah thingphun, thisen pek, hnuchham in tlawh, awareness hrang hrang vantlang tana buatsaih, kawngpui leh vantlang hmun pawimawh tihfai te a tel a. Mizoramin COVID19 hrileng avanga harsatna a tawh mek lai pawhin NSS volunteer ten healthcare worker te puiin vaccine center hrang hrangah an duty a. Mi harsa zawk te tan ei leh in tur chi hrang hrang, nuai sawmpanga (Rs 15 lakh) hu zet Mizoram hmun hrang hrangah a thlawnin an sem a ni.

NSS volunteer ten a thlawna thisen pekah an thawk hlawk hle a. A thlawna thisen pekah hmahruaitu an nih zel theih nan Sports Minister’s Trophy for Voluntary Blood donation chu Sports Minister Pu Robert Romawia Royte hmalaknain sem thin a ni a. Kuminah hian College zingah Pachhunga University College chuan thisen unit 364 pein pakhatna an ni a, Govt. Hrangbana College (thisen unit 190) leh Lunglei Govt. College (thisen unit 123) te chu pahnihna leh pathumna an ni. Higher Secondary School atangin Synod HSS, Baptist HSS leh Govt. KM HSS ten lawmman an dawng bawk. Certificate bakah lawmman pakhatna hian cheng 50,000, pahnihnain cheng 30,000 leh pathumnain cheng 20,000 an dawng a ni.

Khuallian hian NSS Annual Achievement Report 2020-2021 chu a tlangzarh bawk.

NSS dinchamphaphak hi Mizoram pumah NSS unit hrang hrangten anmahni remchan dan angin an lawm a. A thenin thisen an pe, a thenin anmahni Institution leh vantlang hmun an ti fai a. A then chuan anmahni Plantation site ah te kalin an tifai a ni.

Vawiina Aizawla NSS Day lawmna programme hi Dr Lalzarmawii Programme Officer, Govt. Aizawl North College chuan a kaihruai a. Dr Benjamin L. Saitluanga, Programme Coordinator NSS Cell, MZU chuan April 2021 atanga vawiin thlenga NSS Mizoram activity langsar zual report a pe a ni.

Post a Comment

0 Comments