MYC-in IAS Aspirant-te tana coaching class kalpui dan tur puang

Aizawl, 24th September, 2021 : Vawiin chhun khan Mizoram Youth Commission Chairman Dr. Vanlaltanpuia chuan IAS Aspirants te tana Mizoram chhunga Coaching Class kalpui dan tur a puang a. He programme hi Mega IAS Scholarship for 100 IAS Aspirants of Mizoram ti a hming vuahin kalpui a ni dawn a. Hybrid Coaching Class hmanga kalpui tum a ni.


MYC chuan ALS Satellite Education Pvt. Ltd nen thawhhona thuthlung ziak in ALS-a an National Sales Head, Pu Prateek Bhattacharya chuan ALS aiawha hming a ziak a ni.

He programme hnuaiah hian IAS aspirants mi 100 te exam kaltlanga thlan chhuah an ni ang a, Aizawl, Lunglei, Siaha leh Kolasib Centres ah te Class hi kalpui a ni ang.

Selection Exam hi Aizawl, Lunglei, Siaha leh Kolasib Centre-ah te neih a ni ang a, exam tur te chuan Online registration an tih a ngai dawn a, QR Code pek chhuah turah awlsam takin registration hi tih theih a ni ang. Online registration hi October ni 1 atangin ni 25, 2021 thlenga tih theih a ni ang a, exam chu October ni 30, 2021 ah neih tum a ni.

Online Registration tihna tur link hi reilo teah chhawpchhuah a ni ang.

He programme hnuaia senso tur hi MYC in Rs 60.00 lakhs a tum ang a, ALS lam hian an CSR initiative atangin a bak Rs 34.00 lakh hi an tum thung dawn a ni a. December ni 1, 2021 ah class tan tura beisei ani.

Hemi bakah hian Mizoram Youth Commission chuan Super IAS 40 programme hnuaiah Delhi hmunah mi 40, full sponsorship pe in tirhthlak leh a tum bawk a, a kimchang chu la puanchhuah leh tur a ni.

Vawiina hmalak tum dan puanchhuahna ah hian Dr Vanlaltanpuia, MLA Chairman MYC chuan Pu Zoramthanga Chief Minister thahnemngaihnaah lawmthu a sawi bawk.

Post a Comment

0 Comments