Lehkhabu tihchhuah i fimkhur teh ang u!

- K Remruatfela

Zofate hi kan hnam la tlem ang hu in literature khawvel ah erawh kan intodelh khawp mai a. Kan tawng ngeia lehkhabu ziah chhiar tur pawh kan nei thahnem ta khawp mai. A lawmawm tak zet a ni.

Chutihlai erawh chuan a _quantity_ lam ni lo, a _quality_ lamah hian kan duh tui a hun ta hle em aw ka ti thin a. Kan lehkhabu chhuak thar tam te ka thlir hian _standard quality_ lam hawi lêm lo, _'a hminga chhuah ve hrim hrim atan_ 'a ti a ni ang e, tih mai tur hi a awm ta nual a. Lehkha ziakmite kan inenlet a hun ta hle! Novel leh Poetry lam hi chu lo dah tha ila. A bik takin history leh _fact & figure_ thilah phei hi chuan _Reference_ mumal tak hi kan neih a tul a ni.

Kan ziaktu tam tak hi chuan kan lehkhabu tihchhuah hi kan kalpah mah mah thin em aw ka ti a. _Footnote, Bibliography, Index, List of Statutes, Webliography  etc_. mumal awm lém lo, _plagiarism_ lam rawngkai ni tura rin theih, kan hriat thar leh hmuh dan ang ang _scrutinize_ lêm lova pawngpaw ziak thla ve tawp tawp ni awm anga ngaih theih a tam ta hle a. Hei hian kan lehkhabu a ti _quality_ lova, Research Scholar tam tak te tan pawn _refer_ tur mumal a awm loh phah thin a, a pawi hle a ni.

Pathian khawngaihna zarah lehkhabu hi ka lo ti chhuak ve ta nual a. Ka lehkhabu tihchhuah hnuhnung lamah hi chuan thiam ang tawkin _Footnote_ leh a chunga ka sawi hrang hrang ang khi ka hmang hram hram thin a. A buaipui hautak deuh thin mah se, ka rilru hian _qualitative_ lam a thlir tlat avangin _Research based_ in ka ti hram hram thin a. Lehkhabu pakhat ziak tur hian a lo berah kum 3 te hi hun ka duh thin a. Chhiartu tam tak ten a hlutna hrethiam tawk rih lo mah se, pawi ka ti hran lo!

Lehkhabu hi chu kan thlânlung a tluk bo hnu pawha awm reng tawh tur a nih avangin kan ulukin kan fimkhur em em tur a ni a. _Layout editing_ lamah _Footnote_ siam zel hi harsa kan ti a nih pawhin _Endnote_ tal hi chu i hmang hram hram thin teh ang u. Chuti lo chu kan Scholar te kan ti hawihài lutuk dah ang e...