Doordarshan Channel-a Janis'in KHminga a kawmnaa, 'Hmangaihna hi engtik hun lai ber hian nge a pure ber ni-a i hriat?' tih a zawhnaa K Hminga chhânna kha a dikin a ril ka ti hle mai.
Ni e, a ni taka, kan tleirawl chhuah, tleirawl ât kan pelh hnu si, kan hriatthiam theih dan tur chuan Higher Secondary kan zir hun lai vel kha Hmangaihna hi pawlh dal ni lova a pure hun lai ber niin ka hre ve thin. Khâng hun lai vel kha chuan kan hmangaihte kha an nihna ang angin kan hmangaih bur tawp a, eng ang chhungkua atanga seilian nge an nih a, lehkha a thiam thei em, chhung leh khatte rem tur mi a ni em tih leh tehfung dang zawng zawngte kha kan rilruah engmah a lût lo hrim hrim a, an sakruang mawi leh duhawm kan tihna avang tawp khân kan tui ral a, thinlung zawng zawngin kan hmangaih tawp a, kan hmangaiha te tan chuan engkim kha kan inhuam bur thin kha a ni tawp mai. Khâng hun lai khan Hmangaihna kha a van lo fir tha thin tak em!
EXPLORE MIZORAM hi mi dang i lo hmelhriattir zel dawn nia.
 |
| Janis Hnamte nen DDK Kendra Aizawl-ah |
Tunah erawh kum 30 râl han kai ve tan dawn meuhah chuan thinlungah tehfung hlirin a khat ve tan tawh a. Tleirawl tirh laia kan lungkham ber thin hmelthatna leh pianphung mawina ringawtte kha chu a bûk a rit tawh lo hle! Eng ang chhungkua nge an nih a, innghahna tlâk a ni em? Kristian Chhungkaw dinpui theih a ni ang em? Hrehawm tam tak hmachhawn turin an tough tâwk ang em, hna vangin zin san lawp lawp pawh ngai dawn se chhel takin an tuar thei ang em, lehkha ziah leh lehkha chhiar huna a mood-a chêng tur chuan hmun leh hun fianrial a ngai si a. Chutianga fianrial hun min pe thei turin dawhtheihna a nei ang em, etc etc chutiang zawng zawng hmang khân tehfung hlirin a khat tawh a. Chûng tehfung chuan nasa taka Hmangaihna hi a pawlh dal thin tawh avangin kan tleirawl chhuah tirha Hmangaihna fir tha ang kha kum 30 râl han kâi dawn hunah hi chuan a awm thei tawh thin meuh lo a ni.
Chutihlai erawh chuan famkimlo mihring kan nih avangin a tawpah kan in teh tling lo leh zel bawk si a, chuvangin leng tar ta tam tak an awm phah thin a, len tar mai pawh hi a lo harsa dâwn hauh lo a lo nih hi! Amah K. Hminga ngeiin, 'Ka duhaisam ve chu, ka duhsaisam ve chu; A tlin lohna ka hmuh hnu pawha, Ka thinlung hneh tlattu', a lo tih ang khan tehfung zawng zawng dahthain, mihringte hian hmangaihna hi a nihna ang tawp hian hmangaihna vêkin han thleng tir thei theuh ila chuan hmangaihna hi a van fir tha dâwn tehlul em!❤️
Post a Comment
He post chungchanga i ngaihdan lo sawi ve rawh: