India aiawha MMA World Championship khel turin Mizo tlangval Zarmawia thlang

Aizawl | September 14, 2021: Indian Open MMA  Amateur Championship 2021 September 10 - 13 chhunga  Indore, Madhya Pradesh-a neihah Mizoram leh Mizoram State Mixed Martial Arts Association (MISMA) aiawha khel turin MISMA chuan Mizo fighter pathum a tir a, Gold medal leh Bronze medal pakhat an rawn hawn.

He event hi November, 2021-a India ram aiawha Kazakhsthan-a IMMAF hnuaia MMA World Championship khel tur thlanna a ni nghal bawk. IMMAF world championship hi eizawn nana hmang duh tan professional line-a luh chhohna kawng a ni a; Titan Fc, Invicta FC, UFC ,etc., ten an support a, fighter contract ziahpui tur an rawn zawng thin; chuvang chuan, he event-ah hian State leh Ut 30 lai telin competition a tough hle a ni.  Tin, gold medalist te hi MMA India national federation chuan incentive cash award a pe vek dawn bawk a ni.

Zarmawia, Chite veng chu Lightweight category (-70.3 kgs)-ah gold medal lain World championship khel turin thlan nghal a ni a, Joseph Vanlalhruaia, Hunthar chuan Straw weight category (-52 kgs)-ah Bronze medal a la ve bawk.  Josepha hi Muaythai fighter niin international medalist a ni mek a, national level MMA tournament a vawi khat khelhnaah pawh a ti tha hle a ni. North East mite zingah Mizoram chauh hi medal la awm chhun a ni.

 Zarmawia hian India ramah MMA record dangdai tak mai a nei a, Kum tira National championship-ah khan Welter weight (-77 kgs)-ah champion niin amateur MMA-ah undefeated record a nei mek. Tunah hian a weight cut-in Light weight-ah a khel leh ta a ni. Welter weight leh Light weight national tournament a khelhna-ah hian bout nga ve ve a khel a, vawi khat decision-a chakin a bak zawng chu Ground control TKO leh submission vekin a chak a ni. An bialtu MLA leh Sports minister ni bawk pu Robert Romawia Royte chuan a tuina te hmuin Mizote hming khawvel hriata pho lar theitu ni-a ngaiin kumin chhung atan a personal training fee a tumsak nghe nghe. Tin, Zarmawia te weight hi an tha hle a, amateur MMA record vawi 30 lo nei tawh leh champion lo ni tawh te pawh an awm nuk. Chuvang chuan a inhliam na hle a, quarter final a khelh zawhin a kiu ruh a dawk a, a nak ruh a auh bawk a, damdawi in lamah xray te tih nghal a ni. A chhungte, pawl hruaitu leh a coach te nen inrawnin ṭawngṭainaah an hlan a, private hospital-ah nachawhawkna chak chi a inchiu tir in semi final leh final hi a khel zui ta a, Pathian zarah hnenhna a chang ta a ni. A pa chuan, “mihring tih a ni tawh lo, Pathain a che a ni,” a ti hial.

An khelh dan kimchang chu hetiang hi a ni

Zarmawia, Chite veng (-70kgs)

Round of 32: Nagraj Varma, Andhra Pradesh (via TKO, 2nd Round)

Round of 16:   Nitin Patel, Madhya Pradesh (via TKO, 1st Round)

Quarter-final: Mudassar Shaikh,Maharashtra (via TKO, 1st Round)

Semi-final: Mayur, Chhattisgarh (via Armbar, 1st Round)

Final: Abdel Rehman Mohamad, Telangana (via Split Decision, 3rd Round)

Joseph Vanlalhruaia, Hunthar - Straw weight (-52kgs)

Round of 16:  Ishan, Chhatisgarh (via TKO, 1st Round)

Quarter-final: Arun Kumar Verma, Madhya Pradesh (via TKO, 1st Round)

Semi-final: Lost to Mohd Arbaz, Telangana via unanimous decision.

MISMA chuan kumin chhungin sawrkarin event neih a phal veleh Mizoramah ngei MMA State championship, MMA North East Championship leh fight night te huaihawt ngei a tum bawk a ni.