Health Minister hovin 'Ramhnim damdawi kawtkaiah' programme hmang

Aizawl | September 3, 2021: Vawiin khan Health & Family Welfare Department Minister Dr R.Lalthangliana, State Medicinal Plants Board Chairman ni bawk hovin “Ayush Apke Dwar (Ramhnim damdawi kawtkaiah)” tih programme chu MINECO tualzawlah neih a ni a. India ram zalen kum 75-na lawmna “Azadi ka Amrit Mahotsav” kal zelah National Medicinal Plants Board, Ministry of Ayus, Govt. of India ruahmannaa neih a ni.


Dr R.Lalthangliana chuan Sawrkar laipuiin chhung tin te ramhnim damdawi – medicinal plants uar leh zual tura a duh avangin ram zalen kum 75-na lawmna ni pahfawmin he hun hi neih a ni, a ti a. State Medicinal Plants Board in ramhnim damdawi, thlai chi hrang hrang a semchhuak dawn a, chhung tin ten mahni kawtkaiah leh hmun an neih remchang apiangah phun a, tangkai taka hmang turin a sawm a ni. Tun hma lam zawng aiin India Sawrkar chuan ramhnim damdawi hman uar kawngah tan a la nasa tih Minister chuan a sawi a. Damdawi siam chhuak tu company lian tak tak te pawhin tangkai taka an hman thin medicinal plants te hi Mizoram chhungah pawh damloh ni khuaa inenkawlna atan hmang tangkai turin mipuite a chah a ni.

Ayush apke dwar, Ramhnim damdawi kawtkaiah tih hi ram mipuite’n ramhnim damdawi kan hriatchian lehzualna tur (awareness programme) a ni a. He programme kalpui zelna atan hian State Medicinal Plants Board chuan ramhnim damdawi thlai chi hrang hrang a semchhuak dawn a, hrechiang duh chuan State Medicinal Plants Board Instagram - SMPB Mizoram-ah emaw www.smpbmizoram.com ah en theihin a awm a ni.

Azadi ka Amrit Mahotsav kal zela hmalakna pakhat, ramhnim damdawi chin pun, Cultivation of Medicinal Plants chu September ni 1, 2021 khan Directorate of AYUSH, Bungkawn-ah Dr. Lalkhawngaihi Renthlei, CEO, SMPB chuan a lo hawng tawh bawk a ni.

Vawiin programme tawi te, urhsun taka neihah hian Health Minister chuan MINECO tualzawl hmun remchangah Kawldai (Justicia adhatoda) tiak a phun a. Kalkhawmte hnenah Kawldai tiak hi sem a ni bawk. He hunah hian Dr. PI Bharati, Research Officer, Central Ayurvedic Research Institute, Guwahati pawh a tel a ni.

Post a Comment

0 Comments