COVID - 19 | Health Minister hovin AMC Councillor te leh Aizawl City Area Local Council hotute inkawm

Aizawl, 16th September, 2021 : Vawiin khan Health Minister Dr. R. Lalthangliana hovin a pisa ah Aizawl Municipal Corporation (AMC) Councillor te leh Aizawl City Area Local Council hotuten COVID-19 laka Aizawl khawpui a him theihna tura hmalak ho dan tur an sawiho a, Medical Operational Team Chairman Dr. ZR Thiamsanga, MLA, Aizawl bawrhsap Dr. Lalhriatzuali Ralte, AMC Jt. Commissioner leh Health Department Official ten he hun hi an hmanpui a ni.

Health Minister chuan meeting koh chhan sawifiahin COVID-19 hri vei mek (active case) kan neih zinga 60% chu Aizawl khawpui chhung ami te an ni a, Aizawl khawpui enkawl tura mipuiten an thlan chhuah Councillor te leh Local Council hotute nen kan hmalak dan chungchang leh a kaihhnawih thil pawimawh kan sawiho hi a tul hle a ni, a ti a. Hripui a len tirh atanga hah pawh sawi lova theihtawp chhuaha hma an laknaah lawmthu sawiin, an bial chhung bakah bial pawn thlenga an luangchhuak thinte leh sawrkar hmalakna tha taka an thlawp thin avangin lawmthu a hrilh a. COVID-19 chungchanga thutlukna pawimawh siam a nih dawn reng rengin zau taka inrawnkhawmna neih a ni thin tih a awi a, tlawmngai pawlte, kohhran hruaitute leh medical expert te bakah official pawimawhte nen zau taka sawiho a nih hnua thutlukna siam thin a ni a, mimal ngaihdana kal hi kan duh ngai lo a ni, a ti.

Vaccine pekchhuah dan sawiin Minister chuan tunah hian vaccine dose nuai 10 (10,03,888) kan pechhuak tawh a ni, a ti a. First dose 7,75,106 (82%) pek tawh niin, second dose 3,36,926 (50.5%) pek tawh a ni a, fur lai a nih vanga pek harsatna hmun Mamit leh Lawngtlai district khaw thenkhat pawh fur reh ve leha pe turin ruahmanna kan siam tawh a, hripui laka kan fihlimna tura pawimawh ber pakhat a nih vangin vaccine pekchhuah kawnga tan lakpui turin AMC Councillorte leh ACLLA hruaitute a sawm bawk a ni.

AMC Councillor te chuan an bial dinhmunte an sawi bakah COVID-19 dona kawnga an hmalakna te leh harsatna awm thei nia an hriatte bakah rawtna chi hrang hrang an sawi a, vaccine la thei zawng zawng ten an lak kim vek a pawimawh thu uar takin an sawi a, mipuite zirtir kawngah theihtawp an chhuah dawn tih an sawi bawk a ni. An bial chhung dinhmun an thlirin hri inkaichhawnna tam ber chu thenawm khawveng leh chhungkhat laina inlenpawh atangin a ni tih an sawi a, hemi kawngah hian mipuiten mawhphurhna an neihte uar zawka inzirtir a tul tih an sawi bawk a ni.

Aizawl bawrhsap pawhin Red Zone puan dan kalhmangte bakah 4C inenkawlna chungchangte leh Frontline workers COVID-19 hri kai nunna chante tana Mizoram sawrkarin zangnadawmna a siam dil dan turte a sawi a, AMC hotute chuan zangnadawmna hi tun thla (September) ni 30 thlenga hman tur a nih laiin hrilengin ziaawm lam a pan theih si loh avangin a hun hi pawhsei nise an duh thu an sawi a ni.

Vawiin meetingah hian tunhnaia frontline workers, Task Force hruaitu pawimawh tak tak mi pahnih Pu Vanlaldika, Laipuitlang Aizawl City Area Local Council Association Treasurer leh Pu Lalngaihawma, Venghnuai Local Council Chairman ten COVID-19 vanga nunna hlu tak an chan chu pawi an tih thu leh an sun thu an tarlang bawk a ni.