FOOTBALL | Santosh Trophy-ah Mizoram team tel dawn

Aizawl | September 16, 2021: Mizoram Football Association (MFA) Executive Committee Meeting chuan Santosh Trophy-ah team tirh an rel.

Santosh Trophy Champion Mizoram Team hmuah lai

Mizoram Football Association chuan November aṭanga ṭan tur Santosh Trophy-ah team tirh ṭha a ti a, National Senior Women's Championship-ah team tirh ni se, a ti bawk.
All India Football Federation chuan Covid-19 avanga hun rei tak state leh state inelna football a neih theih loh hnuah kalpui ṭan leh turin ruahmanna a siam a; vawiin, September 15-a MFA Executive Committee ṭhukhawm chuan Santosh Trophy a tel turin thuthlukna an siam a ni.


Santosh Trophy NorthEast Zone Qualifier-hi November 21 leh December 5 inkar hian Shillong leh Imphal-ah khelh a ni dawn a, fixture tihchhuah a la nih loh avangin Mizoram awmna group tur zawk hi a la hriat loh.
Mizoram team enkawl tur hian MFA Technical officer Samson Ramengmawia bakah Executive Committee Member K. Lalenghluna leh R. Lalramzauva-te ruat an ni a, an thawhpui turte ruat leh tur a ni ang.
November 10-30 inkar hian hmeichhe football inelna Senior Women's Championships neih a ni dawn a, MFA pawhin team tirh a tum. A buaipui turin MFA Women's Committee Chairman Lalruatsanga Tochhawng bakah Suzanne Ralte leh Lalsangzuala Hmar-te ruat an ni.

MFA executive committee chuan 2021 - 22 season chhunga MFA hnuaia committee pêng hrang hrang hruaitute an ruat nghal a. MFA hnuaia inelna hrang hrang kalpui dan tur ngaihtuahin hripui leng chungchanga sorkar dan ngaichang chungin ruahmanna siam a ni ang. MFA chuan hripui leng avanga footballer tam takin hun ṭha an chân chu pawi a ti a, hun remchang a inhawn hunah inelna buatsaih ṭan leh tum a ni.

MFA Annual General Body Meeting pawh May thlàa neih tura ruahman chu sawn hlat a ni a, sorkar SOP-in a phal chuan kumin chhunga neih tum a ni a; hetah hian Mizoram chhunga district hrang hrang inelna kalpui theih a nih leh nih lohte rel a ni ang.







Post a Comment

He post chungchanga i ngaihdan lo sawi ve rawh:

Previous Post Next Post