CHIEF MINISTER IN CANCER HEMNA KHAWL THAR A HAWNG

Aizawl | September 10, 2021: Chief Minister Pu Zoramthanga chuan nimin khan Mizoram State Cancer Insitute (MSCI), Zemabawk ah cancer hemna khawl lian, Truebeam Liner Accelerator (LINAC) chu a hawng. He khawl leina leh a chah thlenna atan hian cheng vaibelchhe 17 chuang sen a ni.

Chief Minister Pu Zoramthanga chuan cancer tamna state-ah cancer veite enkawlna tur khawl tha dangdai tak, tunlaiah chuan a changkang berte zing ami hman theiha hawn a ni ta chu lawmawm a ti a. Vengchhung mipui leh Aizawl khawpui chauh ni lo, state pum leh thenawm state-te tan pawh tangkai tak a nih tur thu a sawi a. Cancer enkawlna leh mipui hriselna chu sawrkarin a ngaihpawimawh thu leh, inenkawlna tihchangtlun leh tihhmasawnna atan chuan neih ang ang hman zel a nih thun thu a sawi a. Tuna covid-19 hrileng mekah pawh theihtawp sawrkarin a chhuah thu a sawi a. Mass testing ngawrh taka kalpuiin, rinhlelhawmte kan theih chin chinah kan inchhui zui zelin, positive kan hmuhchhuah tam phah reng a. Theihtawpin positive enkawl ngaite kan enkawl avangin hmarchhak state zingah Mizoramah thi an la tlem ber thung a, hemi hi health lama thawktute bakah mipui, task force, NGO, leh kohhran ten theihtawp kan chhuahhona a tilang a ni, tiin lawmthu a sawi.

Health & Family Welfare Minister Dr. R. Lalthangliana pawhin khawl changkang tak leh state in a mamawh tak hawn a ni chu lawmawm tiin, a mamawhtuten tangkai taka an hman a duhsak thu a sawi a. Cancer veite enkawlna tura state hmalakna hrang hrang lo awm tawh leh awm mekte sawiin, chung zingah chuan JICA nen thawhhona thuthlung ziah hnua a cheng vaibelchhe 500 hmanga Cancer Super Specialty Hospital din tura hmalakna pawh tluang taka a kal zel thu a sawi.

He hunah hian Vice Chairman, H&FW Board Dr. ZR Thiamsanga pawhin thu sawiin, COVID-19 hrileng karah khawl tha tak neih thar a ni chu lawmawm tiin, Mizoramin cancer enkawlnaah bung thar a kai a ni, a ti a. Mizoram chu cancer vei tamna state a ni chu pawi a tih thu leh, invenhimna lamah pawh inhrilhriatna tha zawk neih a tharthawh leh pawimawh a tih thu a sawi bawk.

TrueBeam LINAC khawl hi a lei leh chah thlenna mai bakah a dahna tur in/bunker (a bika sak ngai) leh a ken tel hrang hrang te nen hian a vaiin cheng vaibelchhe 22 chuang man a ni a. Phai lam atanga company mithiam te chah a ngaih avangin COVID-19 hrileng avangin duh anga chaka hmalak theih a ni lo a, August 2021 khan Operational License hmuh a ni. He khawl hi American company Varian Medical System siam niin, Radio isotope hmang lo a radiation dose sang tak, electricity hmanga siam chhuak thei a. He khawl hmang hian cancer cells bik te chauh hemin, a bulhnaia timur hrisel a khawih tel dawn lo a. State pawn a damlo tam tak refer thin te chu he khawl hmang hian a enkawl theih tawh dawn a ni.

Linear Accelerator hi 1970 chho ah hmuhchhuah niin India rama a hmasa ber atan Cancer institute, Chennai ah bawk kum 1976 khan bun a ni. Khawvel thiamna thang chho zel leh technology a hmasawnna nasa takin Linear Accelerator ah pawh nghawng rawn nei chho zelin, tuna kan khawl TRUE BEAM hi a rawn hrinchhuah a ni a, A hma a khawl te aia hman nuam, awlsam leh changkang, damlo enkawl nana hun duh rei lo thei tur leh Imaging technology tha taka thuam a ni a, 3D thalak nan hun sen 60% zet a tlem leh X ray dose 25% zet a tlem zawk tur a siamchhuah a ni. Damlo te rilru la peng thei turin Built-in music system pawha thuam niin, thawm bengchheng siam lo thei tur ang ber a siam a ni bawk.

He khawl hian Radiation energy chi tam tak a pechhuak thei dawn a, chungte chu Photon beam pathum (6, 10 leh 15 MV), FFF pahnih (6 & 10 MV) leh Electron beam paruk (6,9,12,15,18 leh 22 Mev).

He khawl hmang a Cancer hem dan chi hrang hrang kan tih theih tur te chu:

1.Conventional Radiotherapy

2. 3 D Conformal Radiotherapy

3. Intensity Modulated Radiotherapy

4. Volumetric Modulated Arc Therapy / Rapid Arc

5. Image guided Radiotherapy

6. Stereotactic Radiotherapy/ Radiosurgery

7. Electron Beam

TrueBeam hian Treatment Planning system tharlam tak Eclipse Version 16.1 (computer monitor 6) a keng tel a, Server pawimawh tak (24hrs AC mamawh) in Varians software hmunpui Switzerland nen min thlunzawm in kan Institute pawh Human error awm palh thei lakah min veng reng thei dawn a ni. Software hi paperless system tur a duan a ni.

Tun dinhmunah MSCI ah hian Cancer enkawlna Radiotherapy khawl chu vawiina hawn tak Linear Accelerator – TrueBeam (Varian) bakah hian Telecobalt machine a awm a (heng chi hnih hi teletherapy machine an ni); Brachytherapy khawl hman thuai theih tur bun a ni tawh bawk a, heng bakah hian Supporting Unit -X Ray, CT Scan, etc a awm a ni.

 Khawl thar hawnna puala inkhawm tawi buatsaih hi H&FW Secretary Pu R. Lalramnghaka chuan kaihruaiin, MSCI Director Dr. Zoramthanga hnen atangin Tertiary Care Cancer Centre (TCCC) project chungchang tlangpui ngaihthak a ni a. MSCI hi TCCI hnuaia din niin, vawiina hawn tak TrueBeam LINAC pawh he project hnuaia mi hi a ni zel a ni. Dr. B Zothankima, Head of Radiation Oncology, MSCI chuan LINAC khawl chungchang hi report a pe bawk a; inkhawm hi Hospital & Medical Education Director Dr. T. Lalhmangaihi chuan lawmthu sawiin a titawp a ni.