Chhûngkaw lungrual, Kristian Chhûngkua..

- K Remruatfela

1. Zir mi te chuan khawvela Institution hmasa ber leh pawimawh ber chu Chhûngkua hi a ni a. Society Inrelbâwlna tinreng hi chhûngkua in a hrin chhuah a ni an ti thin a, a dik takzet a ni. Chuvangin, Chhùngkaw inrêlbâwlna hi kan ngaih pawimawh a ngai takzet a. Chhûngkaw lungrual, Kristian Chhûngkua kan nih ngèi theihna turin Chhûngkaw maichâm kan neih fo pawh hi a ngai a ni.

2. Kan society a bawlhhlawh, thatna a tlâwm a, dikna a fam ta kan tih fo na chhan pawh hi a bul berah chuan mahni chhûngkua theuha kan inrêlbâwlna a fuh tâwk loh thin vâng a ni a, a pawi takzet a ni. Kan khawtlâng a dam a, kan ram a lo dam lehna turin Chhûngkua atang ngeia bul kan tan that leh hi a ngai tak meuh tawh a, Chhûngkaw puipa ber atan Isua Krista hi i au tak meuh meuh ang u.

3. Lockdown/Curfew hi Chhûngkaw kima Lalpa rawng  kan bâwlna hun hlu leh remchâng tak a ni a. Pathianin he hun tha min pêk hi chhûngkuaa Pathian faka zâi ho thup thup pawimawhzia kan hriat a, Chhûngkuaa Pathian thu zirho leh sawiho pawimawhzia kan zir chhoh a, Chhûngkuaa tawngtaiho a hlutzia min hriat thar tîrtu lo ni thei se a duhawm takzet a ni.

4. Keini Chhûngkaw tinte hian Hruaitu ropui Joshua anga, _'Kei leh ka chhûngte erawh hi zawngin Lalpa rawng a ni kan bâwl dâwn ni'_ kan tih ve ngam tlat chuan kan chhûngkuaah, kan khawtlângah, kan Kohhranah, kan ramah Pathian ram a lo thleng ngèi dâwn a ni tih hi ka chiang em em a ni. Chuvangin, Lalpa chênna tlâk chhûngkua kan din a, Chhûngkaw tinte hian  Chhûngkaw puipa bera Isua Krista kan neih theuh theihna turin Pathian hnênah tih tak meuhin i inhlân thar theuh ang u.

Chhûngkaw lungrual, Kristian Chhûngkua,
Kan nih theih nan, Lalpa;
Lo chêng ang che, Krista nang ngèi,
Kan In, kan thinlungah.

Post a Comment

0 Comments