Guwahati, 17th August, 2021: Union Health Minister Mansukh Mandaviya hovin vawiin khan India hmarchhak State 8 Health Minister te COVID-19 hripui leng chungchangah an inkawm a, “Review Meeting on Covid-19 pandemic and immunization in North Eastern States” tia vuah Assam Administrative Staff College, Guwahati -a neihah hian Health Minister Dr. R. Lalthangliana pawh tel ve in Mizoramin COVID-19 hripui leng a hmachhawn dan a sawi fiah a, hun lo kal zel tur thlirlawka Mizoram mamawh chi hrang hrang a thlen bawk a ni.
Dr. R. Lalthangliana chuan powerpoint hmanga presentation pe in nikum kum tira sawrkar laipuiin hripui leng vanga ralkhel dar a vuak veleh khan rang takin hma an la tih a sawi a, China atanga rawn haw te chu Mizoram luhka ah an lo endik nghal a, February ni 1 atangin Lengpui Airport a khualzin rawn lute an lo endik nghal tih sawiin India ramah Airport screening ti hmasa ber an ni hialin a hriat thu a sawi a, February thla tir lamah Mizoram luhka hmun pawimawh zawng zawngah screening point an siam nghal tih a sawi a. India ram puma lockdown puan a nih hma khan mizoramah chuan lockdown an lo puang tawh tih a sawi bawk a ni.
Mizoram dinhmun tarlang bawkin Mizoram chu India hmarchhak kila awm a nih vangin hripui hi a lut tlai deuh thin a, second wave pawh kha India ram hmun dang aiin a rawn thleng tlai tih a sawi a, hripui kai thar la sang viau in lang mahse a vawrtawp kan thleng tawh nia a lan rualin tlakhniam lam kan pan ve tan niin a hriat tawh a ti a, hri kai la tam mahse mipui leh sawrkar an tanrual tlat avangin nunna chan erawh India ram hmun dang nen khaikhin chuan kan tlem hle a ni, a ti.
Contact tracing leh quarantine kalpui a nih dan te sawifiahin sawrkar department hrang hrang, police, NGO, sakhaw hotute leh mipui aiawh khawtlang hruaitute an tangrual tha em em a, sawrkar laipuiin hri kaite enkawlna tura a ruahman DCH, DCHC leh CCC te bakah khawtlangin 4C an siam tih sawiin hei hian hri kaite lakhran leh rang taka enkawlna kawngah nasa takin awmzia a neih phah a ni, a ti a. Heng CCCC te hi Indian Medical Association leh local volunteers (LLTF/VLTF) ten sawrkar pur buai miah lovin an enkawl tih sawiin, hripui leng do tur hian hlawh beisei lovin a tul an gang thawk turin daktawr pension tawhte, private nurse te, healthcare workers te leh mitlawmngaite a tul an gang thawk turin mi engemawzat an inpe tih a sawi bawk a ni. COVID-19 vanga damlo enkawl laite ei leh in tur mimal, khawtlang leh sakhaw bil angte a a thlawna an pek nasat thu a tarlang bawk.
Mipuite leh sawrkar an inthlawp tawn tlat avangin hripui leng dona kawngah awmze nei takin hma lak a ni tih sawiin Dr. R. Lalthangliana chuan State leh District leve bakah Village/Local level ah Task force din a nih thu a sawi a, khawtlang hruaitute leh NGO te pawhin tha leh zung thawhin theihtawp an chhuah a ni, a ti a. Lockdown puan laia harsatna mipuiten an tawh loh nan thingtlang khaw hrangb hrangin khawpuia harsatna tawkte ei tur la khawmin a man phut hauh lovin an pe a, hetih rual hian sawrkar pawhin Horticultute Department kaltlangin Vegetable Supply Chain a buatsaih a, hei hian thingtlang loneitute phurrit nasa takin a chhawk zangkhai tih a sawi a. frontline Workers te hman tur PPE suit pawh Commerce & induatries kaltlangin tualchhunga puan thui ten an thui thin tih sawiin hei hian hripui leng vanga eizawnna kawnga harsatna tawk tur mi engemawzat a chhawk zangkhai tih a sawi a ni.
First Wave leh Second Wave dinhmun fiah taka tarlangin Minister chuan second wave ah nasa takin kan tuar a, kum naupang lamah hri kai an tam hle tih sawiin theihtawp chhuaha hma an lak avangin harsatna lian em em an tawk lo tih a sawi a, third wave lo thleng thei laka inpuahchahna pawh tluang takin a kal tih a sawi a ni.
Vaccine pek chungchangah Mizoram chu India ramah a titha pawl an ni tih tarlangin Local level task Force te leh NGO bakah sakhaw hruaitute nen tang tlangin ruahmanna siam thin a ni a ti a, mipuite zirtirna pek kawngah nasa taka tan an lak vanga vaccine pek chhuah kawngah pawh hmasawn an nihn thu sawiin tunah hian kum 18 chung lam first dose la 83% an ni a ti a, full dose la hi 34% an nih thu sawiin reilote ah vaccine la thei chin chu an pek zawh thuai a beiseiawm tawh tih a sawi a ni.
Dr. r. lalthangliana chuan rawtna chi hrang hrang a thlen a. Hmarchhak state ten harsatna hrang hrang kan neih te sawihoa chinfel dan ngaihtuah turin Union Health Minister in Delhi ah meeting huaihawt leh se tia a rawt bakah, Union Health Minister hnenah hian Hmarchhak State bikte health sector buaipui tur bik officer dah ni se, hemi atan hian Central Ministry a Joint Secretary aia hniam lo ruat ni se tiin rawtna a thlen a, DoNER MInistry atanga NLCPR hnuaia 10 % Hmarchhak State te tana dah hran chu Covid dona atana mumal taka hman zung zung a nih theih nana hma lakpui turin Union Minister hi a ngen bawk a ni.
Dr. R. lalthangliana chuan India hmarchhaka Health Minister te chu hmarchhaka mipuite hriselna tihhmawsawn kawngah thukhat vua a theihtawp chhuah puiah a sawm a, kan inunauna leh tanrualna hmangin India hmarchhak atang hian COVID-19 hripui hi kan umchhuak thei ang a ti a ni.
Vawiin meetingah hian State hrang hrang Minister ten an state a COVID-19 dinhmun leh covid vaccine an pekchhuah dan bakah an hmachhawp te tarlangin presentation an pe bawk a ni.
Health Minister hi Mission Director, NHM Dr. Eric Zomawia leh State Nodal Officer, IDSP Dr. Pachuau Lalmalsawma ten an tawiawm a ni.
- DIPR
Post a Comment
He post chungchanga i ngaihdan lo sawi ve rawh: