THU ṬHAIN NI KHAR ṬHIN RAWH

- Rick Warren

- 18 August, 2021



“Ram te, thiltihtheihna te leh ropui te chu chatuanin i ta a ni e. Amen.” Matthaia 6:13 (AMP).

Ni i khar dan a zirin i mut danah pawh danglamna a awm a. I mut dan a zirin a tuka i thil tihah nghawng a nei thei bawk a ni. Awmze neia nung tur chuan, ni i khar ṭhat a pawimawh a ni. 

Thu ṭha – malsawmna thuin ni khar fo rawh. Pathian Thu aia thu ṭha dang a awm chuang lo. Pathian thutiam te chhiar la. Thu dikin infuih thar fo la, Lalpa ṭawngṭainaa a thu hnuhnung ber ang hian: “Ram te, thiltihtheihna te leh ropui te chu chatuanin i ta a ni e. Amen.” Matthaia 6:13 (AMP).

He mi thu anga ni i khar a nih chuan, tui takin i mu thei ang, a chhan chu thu dik pahnih min fuih phur thei a ken tel vang a ni.  

Pathianin engkim a thunun

Politician ten thuneihna an nei lo. Ramdang mi ten an nei lova. I hnathawhnaa i pu khan a nei hek lo. Pathian hi thuneihna tawp neitu chu a ni. Bible chuan, “Lal thinlung chu Lalpa kutah a awm a, tui luanna kawng angin, a duh duhnaah a tikawi ṭhin” a ti. (Thufingte 21:1). Chuvang chuan Pathian mite an ṭawngṭai hian khawvel a danglam ṭhin. Ani chuan engtik lai pawhin kan biak theih tur leh hrehawm ti taka kan ritphurh te thlen turin min nghak reng a ni.

Pathian leh a chhungten a tawpah hnehna an chang!

Hei hi thawnthu tawpna a la ni lo. Bible hi a bung hnuhnung ber i chhiar khan Pathian chu a chak a ni tih i hmuchhuak ang. I mut dawna i thil en hnuhnung ber chu chanchin thar emaw TV a thupuangtuin chanchin thar an puan emaw a nih chuan rilru hrehawm ti takin i mu ang. Amaherawh chu Pathian thutak nena mut hmun i pan a nih chuan, thlamuang takin i mut hmun i pan thei ang.

Mihring an sam vak laia damchhuak Corrie Ten Boom khan heti hian a sawia, “Khawvel i en chuan, i lungngai ang. A chhunga chengte i en chuan, i mangang ang. Isua i en erawh chuan, i hah chawl thei ang.”  

I chawlhna tur chu khawiah nge i zawn le? Ni i khar fel hmain, Pathian thutak chu in hrilh thar fo rawh. Hetiang hian bia la, “Pathian, engkim chunga thuneitu i ni a. Hei hi thawnthu tawpna tur a ni lo, a tawpah chuan kan chak a ni. Muttui le, Lalpa. Naktuk zingah kan in hmu leh dawn nia” tiin. 

Tichuan, thlamuang takin mu ang che.

Han ngaihtuah la

Tui taka i mut hian eng nge danglamna nangmahah awma i hriat le – taksa, inlaichinna, rilru leh thlarau lamah?

Pathian Thu chuan engvangin nge thlamuanna a pek bik che? 

Thu ṭha – Pathian Thu a ni i khar ziah theih nan engtiangin nge pen khat talin hma i lak ang le?

Kristaa awm te tan chuan thiam loh chantirna tur reng a awm tawh lo

Bible chuan mi tumahin Pathian ropuina an chang zo tawh lo a ti a. Mahse Pathian chuan  sualin vak bo mah la a la hmangaih reng che a ni. A dika dik chuan, Pathianin a hmangaih em che avangin a fapa Isua chu i sualna tleng tur leh Pathian chhungkuaa i luh theihna turin a rawn tir a ni.  

Pathian chhungkuaa lut tura i inpeih a nih chuan hetiang hian ṭawngṭai rawh le. “Lalpa duh tak, ka thih hunah chuan ka nunna chu i hnenah a awm dawn tih ka hria a. I lakah thil ka lo ti suala, nangma duh dan ni lovin keima duh danin ka lo nung ṭhin a. Chu chu tunah hian inthlak danglama, bul ṭan thar ka duh a. Ka sualna te hi hawisana i hnen lam lo hawi ka duh a ni.  

“Isua chu mi zawng zawng aia thi tura i rawn tirh avangin ka lawma, ka thiltihsual te avanga hremna ka hmuh tur chu ka pumpelh phah a ni. Min ngaihdamna chu ka phulo a ni tih ka hria. Lalpa, i khawngaihna chauh chuan min chhandam thei a ni tih ka hria. Famkimna hmuna tel tur chuan ka ṭhatna hian a tlin ngai dawn lo a ni tih ka hria.

“Isu, min hmangaih em avanga ka sualna te i inbel vek avangin ka lawm e. Vanrama lut ve tlakah min siama, chuvang chuan khawngaiha min chhanchhuak turin ka dil a che. Isu, ka ring che a. Min chhandamna chu vawilehkhatah, famkimin, chatuan thlengin min tiam angin a nih ka ring e. He lei hi ka chhuahsan hunah pawh, i Lal ramah chuan ka lo zawm ve ngei ang che tih ka ring e. Isua hmingin ka dil e. Amen.”

A chunga mi ang khian i ṭawngṭai a nih chuan, hetah hian min lo hrilh ang che – Rick@PastorRick.com. Isua nena hun i hman zel theih nan thil tangkai tur ka lo thawn ang che. 

[Lettu: Sangpuia]

Post a Comment

0 Comments