Ticker

10/recent/ticker-posts

Ṭahna ruam

ahna ruam

Sam 84: 5-7.

Vanlalthansanga



Kora fapate hi

Sam bu hi fakna hla hrang hrang phuahkhawm/dahkhawm a ni a, Davida hlate, Asaph-a hlate, Kora hlate, Chhoh hlate leh hla dangte damkhawm an ni. Sam 84-na hi Kora fapate fakna hla a ni. Kora fapate hi Israel hnam (fate) 12 te zinga puithiam chi, Levia thlahte kha anni tiin an sawi a ni, Levia chi an nih angin Kora thlahte chu Temple-a hla satute an ni thin a (2 Chronicles 20:19 ah kan hmu), Temple kawngkhar vengtute an nih thu pawh (1 Chronicles  9:19 leh 26:1, 19) ah kan hmu bawk a ni. Kora fapate han tih hian, a fapa te mai bakah a thlahte zel pawh a huam a ni, chuvang chu a ni mahna, Bible lehlin thar ah chuan Kora pawlte tiin an dah a ni. Tichuan he hla phuahtu Kora fapate awmna hi hriat ni chiah lo mahse, hemi an phuah lai hi chuan Temple atanga hmun hla fe ah an awm niin a lang, tichuan an awmna khua atang chuan Jersusalem Temple ah chuan Israelte kutpui hmang turin leh Pathian fak turin an han kal vang vang thin a ni.

Baka ruam chu

Jerusalem temple pana an zinna kawngah chuan hmun ro leh hrehawm tak paltlang tur an nei a chu chu Baka ruam (the Valley of Baca) an ti a ni, Baka hi Hebrai tawng a ni a, ‘tahna’ tihna a ni. Tichuan Baka ruam chu, Mittui tlakna ruam (The valley of tears) te, the weeping valley (Tahna ruam) te, The dry valley (ruam ro) ti pawhin an sawi thin a ni, kan Bible ah hian “Tahna ruam” tiin an dah a, lehlin tharah chuan “Baka ruam” tiin an dah thung a, a awmzia chu a thuhmun reng a ni. He ruam hi a rovin a hrehawm thin a; mahse Temple-a kal tur leh Temple-a kal tum tan chuan an paltlang ngei a ngai a ni, Chu ‘Baka ruam’ chu ro hle mahsela, tihtakzeta Pathian biak tum te, Temple-a kal tum ruh tlatte leh Pathian biak tum tlatte tan chuan tui hmuh tur a awm mai thin, ruah pawh Pathianin a surtir thin a ni.

 

Jerusalem Temple chu

Israel fate kha hmun hrang hrangah awm mahsela, an thinlungah Pathianin hmun a chang lian hle mai. Israelte khawpui Jerusalem chu hlat hle mahse, an awmna hmun theuh atang chuan Zion-a Pathian in (Temple) chu an hre renga, an thinlungin Zion lamtluang chu zawha Temple-a han kala Pathian biak chu an chak reng thin a ni. Jerusalem leh Zion kan sawi pawlh nawk nawk thina, buai loh tur a ni, an thuhmun reng a ni. Jerusalem khawpuia Zion tlang ah Solomona Temple ropui tak a sak kha a awm a ni. Chuvangin a changing Zion khawpui, Jerusalem khawpui te pawh an ti thin, Chu Jerusalem Temple chu Israel fate tan chuan hmun pawimawh tak a ni a, ‘Pathian chenna,’ ‘Pathian awmna’ niin an ngai a, chutah chuan han kal a, an thawhrimna leh hrehawmna zawng zawng te lak a ta hahchawlh chu an chak thin a ni. 

Pathian fak chak - Kora fapate

Kora fapate (pawlte) hi Temple atanga hla takah an awm avangin, temple-ah an han kal mai thei lova, an duh hun huna Pathian an fak thei thin lo kha hrehawm an ti em em thin a ni, Temple-a Pathian fak leh chawimawi nawm zia leh a hlutzia chu an hria a, chuvang chuan “Ka nunna hian Lalpa biak In hung chhung kawt lai te chu a ngai em em a, a ni, a chauh phah hial a”  an ti a, “I biak in tuala ni khat awm chu hmun danga ni sangkhat awm aiin a tha zawk. Kan Pathian in kawngkhar vengtu nih chu mi sual puan ina awm ai chuan ka thlang zawk” an ti a ni. Chawngzawng leh vamurte tak ngial pawh an awt tawh a, Chawngzawng leh Vamurte chuan Temple chhunga maicham bulah bu te chhepin, note te an neih theih avangin. “I ina chengte chu an nihlawh e, an fak fo thei thin che a ni” tiin an phuah chhuak hial a ni. Chutiang taka Pathian pawl chak; Pathian fak leh chawimawi duhna thinlung neite chu Baka ruam, ruam ro leh hrehawm, tui awmlohna hmunte pawh chu kal tlang mahse an chau lo, eng vang in nge an chauh loh? An thinlungah zion panna lamliante chu a awm tlat avangin, hrehawm mahse Pathian fak an duhna leh an chakna chu a nasa zawk a ni.

Ṭahna ruamah pawh

Hmun ro leh hmun hrehawmah pawh, tahna ruamah pawh kal mah sela, Pathian an beiseina leh Pathian fak an duhna thinlung chuan an rilru a siam thar a, an ke pen te chu a ti nuama; an tha a zang tawlh tawlh a, tichuan an kal zel a, Davida khawpui Jerusalem chu an han thlenga, Zion- tlanga, an Pathian biak thinna Temple chu an han thleng ngei a, chu hmun ah chuan, Pathian hnenah chuan hahchawlhna an hmu a, Pathian chu an chawimawi a, am tak leh duhthawh takin Pathian chu an fak ta thin a ni.

 

Keini ringtute pawh hian

Keini ringtute pawh hian tahna ruam, harsatna ruam, lungngaihna ruam, beidawnna ruam, ro na ruam kan zawh chang a awm fo mai; tahna ruamte, lungngaihna leh ro na ruamte kan zawh lai chuan hrehawm kan tiin, harsa kan ti fo thin. Nimahsela Pathiana innghata, amaha chakna neitute chuan malsawmna leh Pathian pawlna thar an dawng leh thin a ni. Chu harsatna ruam, tahna ruam, mittui tlakna ruam leh beidawnna ruam chu lo zawh tawhin, Pathian dem mai duhna thinlungte pawh i nei mai thei, nimahsela chu harsatna ruam, lungngaihna ruam leh tahna ruam atang chuan Pathian beisei tlat la, Pathian chu kalsanin pen bosan lo la, zui tlat la, Pathianin a hruai zel ang che. Harsatna leh tahna ruam atangin Pathian chu kan hmu hnai leh zual thin a, Pathian ropuizia chu kan hre zual deuh deuh thin a ni.

Tahna ruam atangin

Tunlai hian kan thalaipuite zingah mahni intihlum an awm fo mai, a pawi ka ti hle a ni. Mihring fate zingah ro na ruam, tahna leh mittui tlakna ruam zawh lo tumah kan awm lo. Tute pawh hian harsatna leh manganna kan tawk thin. Sam ziaktu anga Pathian fak duhna thinlung kan neih angai a ni. Tahna ruam atang chuan Pathian kan mamawh leh zual a ni. He laia fakna hla phuahtute ang hian, Pathiana rinna neite chuan hahchawlhna an hmu thin a, Pathian bel tang tang ten a tawp a tawpah zawng malsawmna an dawng nge nge thin; tahna ruam atangin Pathian chu a chiang leh zual thin a, Pathian nena inzawmna thuk zawk kan nei thei thin a ni. Pathiana rinnna nei tlatte chu Lalpan a pui thin, chakna thar neiin, tuihna kang ngai lo chuan a chawm thar leh thin a ni.

Tahna ruam kaltlang tawhte

I nunah harsatna tawkin, i lungngaiin i rum thin ang, hringnun hi hrehawm pawh i thin ang. Khawvel chhuahsan pawh i duh hial ang, nimahsela Pathian beisei tlat rawh. Pathian chu nghak tlat la, a hun takah Lalpan a pui ang che. Mangan tawpah tanpuitu a lo lang thin a, Harsatna phenah Lal Isua a lo lang thin, hrehawmna piahah malsawmna a awma, lungngaihna piahah hlimna eng a lo lang thin a ni. Tahna ruam kaltlang tawh ten Pathian a awm ngei a ni tih an hre thin, ro na ruam kaltlang tawh ten Thlarau malsawmna an dawng thin a, mittui tlakna ruam kaltlang tawhten hlimna thuruk an chhar thin. Hrehawmna ruam leh sawiselna ruam kaltlang tawhten Pathian ropui zia an hmu thin a, harsatna ruam kaltlang tawhten Pathian fak nawm zia leh hlutzia an hre thin a, chakna atangin chak leh zualna ah an kal zel thin a ni.


image sources; Internet

 

 

Post i hmuh dan

Post a Comment

0 Comments