Sumdawng pawl - MBCC hruaitute leh Chief Secretary inkawm

* Total Lockdown vanga an harsatnate Chief Secretary-ah thlen

* flag dum tar sut turin Chief Secretary-in ngen

Aizawl | August 4, 2021: Nimin khan Mizoram Business Coordination Committee(MBCC) hruaitute chuan Chief Secretary Pu Lalnunmawia Chuaungo an kawm a. Chief Secretary leh Sumdawng pawl hruaitute chuan boruak thatak hnuaiah inpawh tlang takin Hripui leng avanga inkhhuahkhirhna in sumdawnna a nghawng chungchang te sawiho a ni a. He hunah hian MBCC chuan Total Lockdown vanga an harsatnate chu Chief Secretary hnenah hian an thlen bawk a ni.

Sumdawng pawl hruaitute hnenah hian Chief Secretary chuan MBCC member te leh sumdawng te chu COVID-19 hripui vanga inkhuahkhirhna in a nghawng nasat ber te zing ami an ni tih sawrkarin a hriatpui thu te a sawi a. COVID-19 do-na kawnga hmalakna hrang hrangah a thawh hlawk ber te zing ami an nih thu te, LLTF te leh chhungkaw khawsak harsa te tanpui tura sum leh pai thawh nasa ber te zing a mi anni tih sawrkarin a hriatpui thu leh an chungah sawrkar a lawm takzet thu MBCC hruaitute hi a hrilh a ni.

COVID-19 vei leh vei lo te hmuchhuak zung zung turin mass testing pawh thui tak kalpui niin, he hna zualpui hi tunkara zawh hman beisei a nih thu a sawi a. Beisei loh taka COVID-19 kai tharte kan pun belh thut a nih loh chuan inkhuahkhirhna te pawh thlah dul theih a beiseiawm thu pawh a sawi bawk a ni.

Hun rei tak dawr khar a nih avangin an sumdawnna hmun leh dawr bungrua te singsak leh tihfai an ngaih thu MBCC hruaitu ten an thlen chu sawrkar in ngaipawimawhin ni 4 – 7 August, 2021 (Nilai – Inrinni) chhung hian LLTF te nen ruahmanna siam a an sumdawnna hmun/dawr leh bungrua singsak leh tihfai hun atan hawn phalsak a ni.

MBCC member ten Total Lockdown avanga harsatna an tawh te lantir nana flag dum tar an rawtna pawh Chief Secretary chuan sut tha a tih thu a sawi a. MBCC member ten COVID-19 do-na kawnga sum leh pai, hun leh tha hlu tak an lo thawh tawh te nen a inmawi loh avangin flag dum zar chu ti lo hram turin MBCC hruaitute chu a ngen bawk a ni.