Ramri buai ngaihvena Journalist lo kalten Home Minister hmu

Aizawl | August 4, 2021: Ramri buai leh a kaihhnawih zirchiang tura rawn kal phai lam journalist ten vawiin chhun khan Home Minister Pu Lalchamliana chu a pisa ah an hmu a, Home Minister hi Pu Lalruatkima, I&PR Minister leh Pu Robert Romawia Royte, Tourism Minister te bakah Home Department Secretary Pu Vanlalngaihsaka leh Home department officials te bakah I&PR Director Pi Lallianpuii ten an tawiawm a ni.


Journalist lo kalte hi BBC Columnist, CNN IBN/News18, Federal.com leh ETV Bharat mi leh sa an ni a, nimin khan Aizawl lo thlengin ramri lam an pan nghal a, Aizawl an rawn kir hnuah Home Minister-in inhmuhna hun remchang a siam sak hlauh an lawm thu an sawi a ni.


Journalist te nen an inkawmhonaah hian Home Minister chuan boruak ralmuang a awm leh hi kan duh ber a ni a, kar hmasa thawhtannia State pahnih inkara buaina thleng avanga nunna chan an awm chu pawi a tih thu leh nunna chan tate chhungte zawng zawng thinlung taka a tawrhpui thu sawiin Mizoram leh Assam lama hliam tuar zawng zawngte tha taka an damchhuah vek theihnan duhsakna a hlan a ni.

Home Minister chuan tharum thawhna hmanga buaina chinfel hi thil tha ber a nih loh thu leh thian anga in ena, inrem taka dawhkan kila sawiho hi a pawimawh ber tih sawiin, rilru tluang tak put tawn chuan State pahnih inkara inremlohna awm hi chinfel theihloh a nih nachhan tur a awm lo tih a sawi.

Hun harsa tak karah thudik hriat tuma Mizoram an rawn tlawh avang leh buaina chhuahna hmun an tlawh avangin lawmthu a lo hrilh bawk a ni.

Post a Comment

0 Comments